فوتورەپورتاج: باس ءمۇفتي ايت نامازىن وقىپ، ەلىمىزدىڭ اماندىعى ءۇشىن دۇعا جاسادى
استانا. KAZINFORM - بيىل ايت نامازى ماڭعىستاۋ، باتىس قازاقستان جانە اتىراۋ وبلىستارىندا تاڭەرتەڭ ساعات 8:00-دە، قىزىلوردا، اقتوبە، قوستاناي، سولتۇستىك قازاقستان وبلىستارىندا 7:30-دا، ال قالعان وڭىرلەردە 7:00-دە باستالدى. بۇگىن استانا مەشىتتەرىندەگى ايت نامازىنا تۇرعىندار تاڭعى ساعات 6 بولماي اعىلا باستادى.
قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى ەلورداداعى رەسپۋبليكالىق باس مەشىتتە ايت نامازىن جۇرگىزىپ، جاماعاتقا ۋاعىز ايتتى.
باس ءمۇفتي جاماعاتتى ورازا ايتپەن قۇتتىقتاپ، مۇسىلماننىڭ رامازاننان كەيىنگى رۋحاني جاعدايى قانداي بولۋى كەرەكتىگىنە توقتالدى.
- وسىدان ءبىراز ۋاقىت بۇرىن عانا ورازا ايىن اسىعا كۇتىپ، سول ايعا امان-ەسەن جەتسەك دەپ جۇرگەن ەدىك، ەندى مىنە، قاسيەتتى رامازان ايىن دا ءتامامداپ، ونىڭ ارتىنشا ايت كۇنىمەن قاۋىشىپ وتىرمىز. رامازان ايى - جىلىنا ءبىر مارتە كەلىپ، جان دۇنيەمىزدى تازارتىپ، ءناپسىمىزدى تاربيەلەيتىن، بويىمىزدا تاقۋالىق قالىپتاستىراتىن رۋحاني ۇستاز. بۇل قاسيەتتى ايدا بويىمىزعا جيناعان رۋحاني ازىعىمىز ءبىر جىل بويعى رۋحاني دەڭگەيىمىزگە اسەر ەتۋى قاجەت. بارشامىز وتكەن رامازان ايىندا ورازا ۇستادىق. تاراۋىق نامازىن وقۋ ءۇشىن مەشىتكە، جاماعات نامازىنا كەلدىك. مۇقتاجدارعا زەكەت- ساداقالارىمىزدى بەردىك. ەندىگى ماسەلە، رامازاننان كەيىن دە وسى رۋحاني كۇيىمىزدى جوعالتپاۋ، - دەدى ق م د ب ءتوراعاسى.
بۇدان كەيىن باس ءمۇفتي جاماعاتپەن بىرگە ايت نامازىن وقىپ، ەلىمىز بەن جەرىمىزدىڭ اماندىعى ءۇشىن ارنايى دۇعا جاسادى.
ايت نامازىنان سوڭ باس مەشىتكە جينالعان قالا تۇرعىندارى ۇلتتىق سپورت تۇرلەرىنەن سايىسقا ءتۇستى. اتاپ ايتساق، «قول كۇرەسى»، «ارقان تارتىس»، «اسىق اتۋ» سەكىلدى ۇلتتىق ويىنداردان جاستار ءوزارا باسەكەگە ءتۇستى.
بۇگىن باس مەشىتتەگى ايت نامازىنا كەلگەن قالا تۇرعىنا وڭداسىن ابەن ۇلى ەلىمىزدىڭ ءال-اۋقاتىنىڭ كۇشەيۋىنە، تاۋەلسىزدىكتىڭ نىعايا تۇسۋىنە دۇعا-تىلىك جاساعانىن ايتتى.
- دۇعا-تىلەكتەرمىز قابىل بولىپ، قازاق ەلىنىڭ اۋىزبىرلىگى بەكەمدەلىپ، ىنتىماعىمىز نىعايا ءتۇسسىن، ەكونوميكامىزدىڭ قۋاتى ارتا بەرسىن. قازاقستاننىڭ كوك تۋى جەلبىرەي بەرسىن. وسكەلەڭ ۇرپاق ءوز انا تىلىندە تازا سويلەپ، ادەت-عۇرپىن مىقتى ۇستانىپ، ەلىمىزدىڭ دامۋىنا قىزمەت ەتسىن دەپ تىلەيمىن. جىل سايىن ورازا ايت نامازىندا، قۇربان ايت نامازىندا وسىنى تىلەپ وتىرامىن. جاستاردىڭ پەيىلىنە كوڭىلىم تولادى، جاستارعا رازىمىن، - دەدى وڭداسىن ابەن ۇلى.
اتاپ ايتقاندا، بۇگىن مەملەكەت باسشىسى قاسىم-جومارت توقايەۆ قازاقستان حالقىن ورازا ايت مەرەكەسىمەن قۇتتىقتادى.
ەسكە سالساق، بيىلعى ورازانىڭ ءبىرىنشى كۇنى 1-ناۋرىزدا باستالدى.
رامازان ورازاسى 29 كۇنگە سوزىلدى. 26-ناۋرىزدان 27-ناۋرىزعا قاراعان ءتۇنى - قادىر ءتۇنى.
ورازا ايت 30-ناۋرىزعا، ال قۇربان ايت كۇندەرى 6-8-ماۋسىم ارالىعىنا تۇسەدى.
سونىمەن قاتار ەلىمىز بويىنشا ايت نامازىنىڭ كەستەسى جاريالاندى.
اۆتور
رۋسلان عابباسوۆ
