فوتورەپورتاج: الماتىدا «تاماشا» سەريالى ءتۇسىرىلىپ جاتىر
الماتى. KAZINFORM - الماتىدا «تاماشا» ءازىل-سىقاق تەاترى جايلى سەريالدىڭ ءتۇسىرىلىم ءجۇرىپ جاتىر. تەلەسەريال Jibek Joly تەلەارناسىندا وسى جىلدىڭ قاراشا ايىندا كورەرمەنگە جول تارتادى.
«تاماشا» سەريالىنىڭ سيۋجەتى 1991-جىلدان باستاپ ءوربيدى جانە قازاق تەلەۆيزياسىندا ەرەكشە ورنى بار تەاتردىڭ تاريحىنان سىر شەرتە وتىرىپ، كەڭەس وداعى ىدىراپ جاتقان ءداۋىردىڭ بەت-بەينەسىن كورسەتەدى. ءبىر جىلعا جۋىق دايىندىقتان كەيىن سەريالدىڭ ءتۇسىرىلىمى 15-قىركۇيەك كۇنى باستالعان. جالپى تەلەسەريالدىڭ ءتۇسىرىلىمى قاراشا ايىنىڭ باسىنا دەيىن الماتى، ەسىك قالالارىندا جانە الماتىعا جاقىن اۋىل-ايماقتاردا جۇرەدى. تەلەجوبا رەجيسسەرى - نۇرعيسا ءالمۇرات.
سەريالدىڭ اتقارۋشى پروديۋسەرى الماس ساعىن ۇلىنىڭ ايتۋىنشا، «تاماشا» - تەاتر ارتىستەرىنىڭ ومىرىنەن شابىتتانعان كوركەم سەريال.
- سەريالدىڭ وقيعاسى «تاماشا» تەاترىنداعى اعالارىمىزدىڭ ومىرىنەن شابىتتانعان. دەگەنمەن، بۇل - كوركەم سەريال بولعاندىقتان، تاريحي جانە حرونولوگيالىق سايكەستىك ساقتالمايدى. سەريالدا اعالارىمىزدىڭ باسىنان وتكەن، كوبىسى بىلە بەرمەيتىن وقيعالارى دا، ويدان شىعارىلعان سيۋجەت جەلىلەرى دە بار. تەلەجوبانىڭ العاشقى بولىمدەرى Jibek Joly تەلەارناسىندا قاراشا ايىنىڭ سوڭىندا كورسەتىلە باستايدى. جالپى ءارقايسىسى 45 مينۋتتان 10 سەريا بولادى، - دەدى الماس ساعىن ۇلى.
ال تەلەسەريالدىڭ كرەاتيۆتى پروديۋسەرى ءارى باستى سەناريستى دارحان وسپانوۆ تەلەسەريالدى تۇسىرۋگە دايىندىق بارىسىندا «تاماشا» تەاترىنىڭ ارتىستەرىمەن كەزدەسۋ وتكەنىن اتاپ ءوتتى.
- بيىل قاڭتار ايىنان باستاپ تياناقتى تۇردە دەرەكتەردى جيناۋعا كىرىستىك. الدىمەن، كوزى ءتىرى تەاتر ارتىستەرىمەن كەزدەستىك. ومىردەن وتكەن تاماشالىقتاردىڭ وتباسىمەن جولىعىپ، ناقتى دەرەكتەر الدىق. مامىر ايىنان تامىز ايىنا دەيىن 4 اي سەناري جازىلدى. ەندى 35 كۇن ءتۇسىرىلىم بولادى. سەريال جەلىسىنە توقتالساق، «تاماشا» ارتىستەرى مەن وعان قاتىسى بار ادامداردىڭ ومىرىندەگى قىزىق وقيعالاردى ءبىز ءار سەرياعا قوستىق. ءبىراق جالپى وقيعا مەن باستى كەيىپكەر - قايسار دەگەن جىگىت ويدان شىعارىلعان. سەريال قازاقستان تاۋەلسىزدىگىن الۋعا جارتى جىل قالعان كەزدەن باستالادى. ءار سەريادا كەڭەس وداعى ىدىراۋىنىڭ ءارتۇرلى جاڭالىقتارى مەن كەزەڭدەرى كورسەتىلەدى، - دەدى سەناريست.
تەلەسەريالدىڭ اكتەرلىك قۇرامىندا ۇلكەن ەكرانعا ءجيى شىعاتىن تانىمال اكتەرلەردەن بولەك جاس تالاپكەرلەر دە بار. بۇل تۋرالى سەريالدىڭ اتقارۋشى پروديۋسەرى الماس ساعىن ۇلى ايتتى.
- ەڭ قيىن جۇمىستارىمىزدىڭ ءبىرى - كاستينگ بولدى. بۇكىل ەلدەن، ايماقتىق تەاترلاردان اكتەرلەر ىزدەدىك. ەڭ ءبىرىنشى تالابىمىز - پورترەتتىك سايكەستىك بولدى. اعالارىمىزعا 100 پايىز ۇقساستىق تابا الماساق تا، بەت الپەتى جاقىن اكتەرلەردى ىزدەدىك. بۇل جۇمىس قولىمىزدان كەلدى دەپ ويلايمىن. اكتەرلىك قۇرامنىڭ ىشىندە ءبىرىنشى رەت ۇلكەن كينودا ءوزىن سىناپ كورىپ جاتقان جاستار دا، ەلگە تانىمال تاجىريبەلى اكتەرلەر دە بار، - دەدى تەلەجوبانىڭ اتقارۋشى پروديۋسەرى.
«تاماشا» سەريالىندا مەيىرمان نۇرەكەيەۆتىڭ ءرولىن كەنەن اقۇرپەكوۆ سومداماق. ونىڭ ايتۋىنشا، تالاي ۇرپاق تەلەديداردان كورىپ وسكەن تەاتر اكتەرلەرىنىڭ وبرازىن سومداۋ - ۇلكەن جاۋاپكەرشىلىك.
- مەن سەريالدا ءوزىنىڭ قايتالانباس تۇلعاسىمەن، قايتالانباس وبرازدارىمەن حالىقتىڭ كوكەيىندە قالعان مەيىرمان نۇرەكەيەۆتىڭ ءرولىن وينايمىن. وسى جوبانىڭ رەجيسسەرى نۇرعيسا ءالمۇرات مەنى مەيىرمان اعانىڭ رولىنە شاقىرعان كەزدە مەن ىشتەي قينالدىم. سەبەبى وسى ۋاقىتقا دەيىن كينولاردا احمەت بايتۇرسىن ۇلىنىڭ، بەردىبەك سوقپاقبايەۆتىڭ، امانگەلدى يمانوۆتىڭ رولدەرىن سومداپ ءجۇرمىن. بۇل كىسىلەردىڭ وبرازدارى سالماقتى، ال مەيىرمان اعا ازىلگە جاقىن كىسى بولعان. ءبىراق «قانشا دەگەنمەن ول كىسىلەردەي بولا المايمىز، بىزدىكى بولماساڭ دا ۇقساپ باعۋ» دەپ وسى سەريالعا قوسىلدىم، - دەدى كەنەن اقۇرپەكوۆ.
تەلەسەريالدىڭ اكتەرلىك قۇرامىنا قوسىلعان جاس اكتەرلەردىڭ قاتارىندا باقىتجان بالاحانوۆ بار. ول سەريالدا باۋىرجان يبراگيموۆتىڭ ءرولىن سومدايدى.
- «تاماشا» سەريالى مەن ءۇشىن ەكىنشى ۇلكەن تەلەجوبا، بۇعان دەيىن «12:86» سەريالىنا تۇسكەنمىن. «تاماشا» مەنىڭ بالالىق شاعىم دەپ ايتا الامىن، بالا كەزدەن كورىپ وستىك. سوندىقتان سەريالدىڭ كاستينگىنەن وتكەندە قاتتى قۋاندىم. سەريالدىڭ ءبىر بولىگى بولۋ مەن ءۇشىن ۇلكەن باقىت، - دەدى جاس اكتەر.
ەسكە سالايىق، بۇعان دەيىن شىنايى وقيعا جەلىسىمەن تۇسىرىلگەن «111» تەلەسەريالىنىڭ تۇسىرىلىمىنەن رەپورتاج ۇسىنعانبىز.
16-قىركۇيەكتەن باستاپ «111» Juz on bir» تەلەسەريالى Jibek Joly تەلەارناسىندا كورسەتىلىپ كەلەدى.
