فورماعا قاتىستى بۇعان دەيىنگى سىن-ەسكەرتپەلەردى ەسكەردىك - دياس احمەتشارىپ
استانا. KAZINFORM - ساناۋلى كۇندەردەن سوڭ وڭتۇستىك كورەيانىڭ كانۆون قالاسىندا IV قىسقى جاس وسپىرىمدەر وليمپياداسى باستالادى.
بۇگىن ەلوردادا سپورتشىلاردى شىعارىپ سالۋ سالتاناتتى شاراسى ءوتتى. وسى ورايدا تۋريزم جانە سپورت ءمينيسترىنىڭ كەڭەسشىسى دياس احمەتشارىپتى اڭگىمەگە تارتقان بولاتىنبىز.
- قىسقى جاسوسپىرىمدەر وليمپياداسىنان قانداي ءۇمىت كۇتەمىز؟ سپورتشىلاردىڭ دايىندىعى قانداي؟
- مەملەكەت باسشىسىنىڭ تاپسىرماسىمەن ازيا ويىندارىنان كەيىن بارلىق سپورت ءتۇرى بويىنشا شتاب قۇرىلدى. ونىڭ ىشىندە قىسقى سپورت جانە كانۆون-2024 جاس وسپىرىمدەر وليمپياداسىنا ارنالعان شتاب تا بار.
وكىنىشكە قاراي، بۇعان دەيىن لوزاننادا وتكەن قىسقى جاس وسپىرىمدەر وليمپياداسىندا جۇلدە بۇيىرمادى. بۇل جولى بارلىق سپورتشى جەڭىسكە دايىن. اتاپ ايتقاندا، شورت-ترەك پەن كونكيمەن جۇگىرۋ سپورتىنان ءۇمىت زور. جالپى كوماندا وليمپياداعا لايىقتى دايىندالدى. سپورتشىلارىمىز جۇلدەسىز ورالمايدى دەپ ويلايمىن. شتاب جۇمىسى اياسىندا سپورتشىلار مينيسترمەن جانە قازاقستانداعى وڭتۇستىك كورەيانىڭ ەلشىسىمەن كەزدەستى.
- جاس وسپىرىمدەر ەل نامىسىن قورعاۋعا، ايتۋلى حالىقارالىق سايىسقا بارا جاتقانىن سەزىنەدى دەپ ويلايسىز با؟
- ءيا، بۇل - ولاردىڭ حالىقارالىق دەڭگەيدەگى وليمپيادالىق ويىندارعا العاشقى قادامى. سپورتشىلاردىڭ اراسىندا بۇعان دەيىن شەتەلدە وتكەن ءتۇرلى جارىستارعا قاتىسىپ جۇرگەندەر دە بار. كانۆون وليمپياداسىنا سپورتشىلارىمىز ليتسەنزيالىق تۋرنيردەن ءوتتى. ناتيجەسىندە قىسقى سپورتتىڭ 5 تۇرىنەن 30 ليتسەنزيا بۇيىردى. جىل باسى جاقسى باستالدى. الدا پاريج جازعى وليمپياداسى بار.
- سپورتشىلارىمىزدىڭ فورماسى تۋرالى ايتىپ بەرسەڭىز. بۇعان دەيىن سىن بولعانى بەلگىلى، بۇل جولى كيىم ساپالى ما؟
- سپورت فورماسى ساپالى. وتكەن ازيا ويىندارىنداعى (حاڭجوۋ) فورماعا قاتىستى ماسەلەلەردى ەسكەردىك. ال پاريج جازعى وليمپياداسىندا باسقا فورما بولادى. وعان بولەك بايقاۋ جاريالانادى. جالپى سپورتتىق فورما حالىقارالىق وليمپيادا كوميتەتىنىڭ ەرەجەسىنە سايكەس بولۋعا ءتيىس. كانۆون وليمپياداسىنىڭ فورماسى - وتاندىق ءونىم، ءوز تىگىنشىلەرىمىزدىڭ قولىنان. ازيا ويىندارىنداعى جاعداي قايتالانباۋى ءتيىس. اتالعان جارىسقا 540 سپورتشى باردى، ونىڭ ىشىندە ەكەۋى فورما بويىنشا ءوز پىكىرىن ءبىلدىردى. ال كانۆونعا 42 جاس ءوسپىرىم سپورتشى بارا جاتىر. ولار فورمامەن تولىق قامتىلدى.
ايتا كەتەيىك، بۇگىن قازاقستاندىق سپورتشىلار كانۆون-2024 قىسقى جاسوسپىرىمدەر وليمپياداسىنا اتتاندى.
IV قىسقى جاسوسپىرىمدەر وليمپياداسى بيىل 19 -قاڭتار مەن 1- اقپان ارالىعىندا وڭتۇستىك كورەيانىڭ كانۆون قالاسىندا وتەدى. قازاقستاننىڭ سپورت دەلەگاتسياسى قۇرامىندا سپورتتىڭ بەس تۇرىنەن 42 سپورتشى بار.
ايتا كەتسەك، جاسوسپىرىمدەر وليمپياداسىندا قازاقستان تۋىن «ۇلتتار شەرۋى» كەزىندە قازاقستان تۋىن كونكيمەن جۇگىرۋدەن پەتروپاۆلدان ۇلتتىق قۇرامانىڭ مۇشەسى كريستينا شۋمەكوۆا مەن ورالدىق شورت-ترەكشى ەراسىل شىڭعىسحان الىپ شىعادى.
قازاقستان جاس وسپىرىمدەر اراسىنداعى قىسقى وليمپيادا ويىندارىنا 2012-جىلدان بەرى قاتىسىپ كەلەدى.
جالپى، ەلىمىز ءۇش قىسقى جاس وسپىرىمدەر وليمپيادا ويىندارىنا قاتىسىپ، ەكى كۇمىس جانە التى قولا مەدال جەڭىپ الدى.
اۆتورداۋلەت ىزتىلەۋ
