فۋتزالدان قازاقستان سۋپەركۋبوك ويىنى العاش رەت ورالدا وتەدى
ورال. KAZINFORM - فۋتزالدان قازاقستانداعى جاڭا ماۋسىم ورال قالاسىندا وتەتىن سۋپەركۋبوك ماتچىمەن رەسمي تۇردە باستالادى.
ب ق و دەنە شىنىقتىرۋ جانە سپورت باسقارماسىنان ءمالىم ەتكەنىندەي، ەل چەمپيوناتىنىڭ جەڭىمپازى - الماتىلىق «قايرات» پەن قازاقستان كۋبوگىنىڭ يەگەرى - «سەمەي» كوماندالارى اراسىندا وتەتىن سۋپەركۋبوك ويىنى 23-تامىزدا «جايىق ارەنا» سپورت كەشەنىندە وتەدى.
بۇل كەزدەسۋدىڭ ەرەكشەلىگى - فۋتزال تاريحىندا العاش رەت سۋپەركۋبوك باسەكەسى باتىس قازاقستان وبلىسىندا زاماناۋي سپورت كەشەنىندە وتكىزىلمەك. بۇل ايماقتاعى فۋتزالدىڭ دامۋىنا جاڭا سەرپىن بەرىپ، جەرگىلىكتى جانكۇيەرلەر ءۇشىن ايتۋلى وقيعاعا اينالاتىنى ءسوزسىز.
«جايىق ارەنا» اشىلعاننان بەرى بيىل سپورت كەشەنىندە كوپتەگەن جارىس ۇيىمداستىرىلىپ كەلەدى. سونىڭ ىشىندە ۆولەيبولدان ەرلەردىڭ ۇلتتىق ليگا كوماندالارى اراسىندا پلەي-وفف باسەكەسى وسىندا ءوتىپ، قازاقستان چەمپيونى انىقتالعان بولاتىن.
ەسكە سالا كەتەيىك، بۇدان بۇرىن «قايراتتىڭ» قازاقستان چەمپيوناتىنىڭ جەڭىمپازى اتانعانىن جازعان ەدىك.
