فەرمەرلەر سۋبسيديا اقشاسىن «جەپ» قويماس ءۇشىن نە ىستەۋ كەرەك

پاۆلودار. KAZINFORM - وتاندىق اۋىل شارۋاشىلىعىن سۋبسيديالاۋ سالاسىنداعى جەمقورلىق، بيۋدجەت قاراجاتىن ۇرلاۋ - ۇلتتىق ەكونوميكانىڭ وسۋىنە تەجەۋ. ۇكىمەت 2025 -جىلدان باستاپ سۋبسيديا ءتارتىبى وزگەرەتىنى تۋرالى ءمالىم ەتكەن.

جاڭاشىلدىقتىڭ ءبىرى اۋىل شارۋاشىلىعى تەحنيكاسىنا بولىنگەن نەسيەنىڭ پايىزىن سۋبسيديالاۋ تالاپتارىنا قاتىستى.

سوڭعى ۋاقىتتا اۋىل شارۋاشىلىعى سالاسىن سۋبسيديالاۋ بويىنشا جەمقورلىق تاۋەكەلدەرى ازايماي تۇر. بۇعان دەيىن جازعانىمىزداي، پاۆلودار وبلىسىندا اگروونەركاسىپ كەشەنى بويىنشا مەملەكەتكە 500 ميلليون تەڭگە شىعىن كەلگەن.

وڭىرلىك پروكۋراتۋرادان ءمالىم ەتكەندەي، كەيبىر جاعدايلاردا اۋىل شارۋاشىلىعى تەحنيكاسىن ساتىپ الۋ تۋرالى ەسەپ بەرۋ اقپاراتى بۇرمالانادى. ءىس جۇزىندە سۋبسيديا پروتسەسى تەك فورمالدى تۇردە ءوتىنىم قابىلداپ، بيۋدجەت قاراجاتىن بولۋدەن تۇرادى.

مىسالى، ەكى اۋىلشارۋاشىلىعى تاۋارىن ءوندىرۋشى زاڭسىز بايۋ ءۇشىن جالپى سوماسى 132 ميلليون تەڭگەگە تەحنيكا ساتىپ الۋعا سۋبسيديا الىپ، كەيىننەن باسقا ماقساتقا جۇمساعان.

ءماجىلىس دەپۋتاتى، اگرارلىق ماسەلەلەر جونىندەگى كوميتەت مۇشەسى نۇرجان اشىمبەتوۆتىڭ پىكىرىنشە، اگروسەكتوردى قارجىلاندىرۋعا قاتىستى ماسەلە سۋبسيدياعا بولىنەتىن قاراجاتتىڭ باقىلانباۋىنان تۋىنداپ وتىر.

- وتاندىق فەرمەرلەردى زامانعا ساي تەحنيكامەن، قۇرال- جابدىقتارمەن قامتاماسىز ەتىپ وتىرعان «قازاگروقارجى» ا ق، «اگرارلىق نەسيەلىك كورپوراتسياسى» ا ق، «دامۋ» قورى جانە وزگە دە قارجىلىق ۇيىمداردىڭ سۋبسيديانى باقىلاۋ بويىنشا تەتىكتەرى جاسالماعان. تەحنيكانى نەسيەگە نەمەسە ليزينگكە بەرەدى دە، مەملەكەتتەن بولىنەتىن بيۋدجەت قاراجاتىنىڭ نىساناعا جەتۋىن قاداعالامايدى. وسىنىڭ سالدارىنان قانشاما فەرمەر نەسيەنى سۋبسيديالاۋ كەزىندەگى قاراجاتتى وزگە ماقساتقا جۇمساپ كەلدى. نەگىزىنەن سۋبسيديا تەحنيكاعا عانا ەمەس، مينەرالدى تىڭايتقىش پەن گەربيتسيدتەر، تۇقىم مەن سۋ ساتىپ الۋعا دا بولىنەدى. بيىل اگروسەكتوردى سۋبسيديالاۋعا 450 ميلليارد تەڭگە قاراجات ءبولىندى. بۇل - وتە كوپ قاراجات. الداعى جىلدارى بۇل سوما ودان سايىن ەسەلەنە تۇسەتىنى انىق، - دەيدى دەپۋتات.

نۇرجان اشىمبەتوۆتىڭ ايتۋىنشا، ۇكىمەت ۇسىنىپ وتىرعان جاڭا ءتارتىپ بويىنشا 2025 -جىلدان باستاپ سۋبسيديا قاراجاتى شارۋانىڭ قاتىسۋىنسىز تىكەلەي قارىز بەرۋشىگە تۇسەدى.

ياعني، جەرگىلىكتى اكىمدىكتەر مەن جاۋاپتى باسقارما بارلىق رەسىمدەۋلەردى وزدەرى جۇرگىزىپ، شارۋا تەك قول قويادى. اتقارۋشى بيلىك سۋبسيديانىڭ رەسىمدەلگەن ساتىنەن تولەنگەنگە دەيىندى ۇدەرىسىن ەلەكتروندى قۇجات اينالىمى ارقىلى باقىلاپ وتىرا الادى.

ال پاۆلودار وبلىسى اۋىل شارۋاشىلىعى باسقارماسىنىڭ مالىمەتىنە سۇيەنسەك، بيىل ەگىن شارۋاشىلىعىن قولداۋعا 7,5 ميلليارد تەڭگە بولىنگەن. قاراجاتتىڭ كوپ بولىگى تۇقىم شارۋاشىلىقتارىن قولداۋ مەن مينەرالدى تىڭايتقىش باعاسىن ارزانداتۋعا جۇمسالعان.

دەيتۇرعانمەن اتالعان قاراجات جەرگىلىكتى فەرمەرلەر ءۇشىن از بولىپ شىققان. باسقارما وبلىس اكىمىنەن شارۋالار ءۇشىن قوسىمشا 3,9 ميلليارد تەڭگە قاراجات ءبولۋدى سۇراپ وتىر.

شارۋالار زامانعا ساي اۋىل شارۋاشىلىق تەحنيكاسى مەن قۇرال- جابدىق ساتىپ الۋى ءۇشىن «بايتەرەك» ۇلتتىق باسقارۋشى حولدينگىنىڭ قارجىلىق ۇيىمدارى 26,4 ميلليارد تەڭگەگە، «قازاگروقارجى» 16 ميلليارد تەڭگەگە قارجىلاندىرعان.

ناتيجەسىندە وبلىس فەرمەرلەرى جاڭادان 1 مىڭعا جۋىق تەحنيكا مەن ءتۇرلى جابدىقتار ساتىپ العان.

ەسكە سالا كەتەيىك، كەشە عانا الماتى وبلىسىندا جالعان كووپەراتيۆ قۇرىپ، 1,2 ميلليارد تەڭگە سۋبسيديانى جىمقىردى دەگەن ايىپپەن تانىمال فەرمەر الماسبەك سادىرباي ۇستالعان ەدى.

اۆتور

مۇرات اياعان