فرانسيانىڭ قارىزى سەكۋند سايىن 5 مىڭ ەۋروعا ارتىپ كەلەدى

استانا. KAZINFORM - پرەمەر-مينيستر فرانسۋا بايرۋ ۆيدەو ۇندەۋىندە فرانسيانىڭ ەكونوميكالىق جاعدايى ناشارلاعانىن ايتتى، دەپ حابارلايدى haqqin.az.

سونداي-اق ول فرانسيانىڭ قارىزىنا توقتالدى.

- كۇندىز-ءتۇنى، سەكۋند سايىن فرانسيانىڭ قارىزى 5 مىڭ ەۋروعا ارتىپ كەلەدى، - دەدى ول.

ەلدىڭ مەملەكەتتىك قارىزى 3,4 تريلليون ەۋروعا جەتكەنى اتاپ ءوتىلدى.

پرەمەر-ءمينيستردىڭ ايتۋىنشا، شامادان تىس بەرەشەك فرانسيا ەكونوميكاسى ءۇشىن باستى قاۋىپ بولىپ تابىلادى، شىعىنداردى ازايتۋ ءۇشىن شۇعىل شارالار قاجەت.

فرانسيانىڭ جالپى ىشكى ءونىمى 2024 -جىلى 3,16 تريلليون دوللاردى قۇرادى. ياعني، ەلدىڭ مەملەكەتتىك قارىزىنىڭ كولەمى ونىڭ ەكونوميكاسىنان اسىپ كەتتى.

ەسكە سالا كەتەيىك، فرانسيا گازا سەكتورىنان بوسقىنداردى قابىلداۋ باعدارلاماسىن ۋاقىتشا توقتاتتى.

اۆتور

بەگابات ۇزاقوۆ