فرانسيانىڭ اتاقتى لۋۆر مۇراجايىن توناپ كەتتى
استانا. KAZINFORM - لۋۆر مۇراجايىنداعى اپوللون گالەرەياسىنىڭ تونالۋى فرانسۋزداردىڭ جاپپاي نارازىلىعىن تۋدىردى. پوليتسيا مەن ەل باسشىلىعى قىلمىسكەرلەردى انىقتاپ، تونالعان جادىگەرلەردى تابۋعا ۋادە بەردى.
Kazinform اگەنتتىگىنىڭ مەنشىكتى ءتىلشىسى وقىرمان نازارىنا اتىشۋلى ءىستى تەرگەۋ قالاي ءجۇرىپ جاتقانى جايلى شولۋ ۇسىنادى.
سوڭعى مالىمەتتەر...
توناۋشىلار ءتورت ادام بولعان. ولاردىڭ ەكەۋى لۋۆردىڭ ءبىر جاق جانىنا توقتاعان اۆتوتيەگىشتە بولعان. ونىڭ بىرەۋى سارى، ەكىنشىسى قىزعىلت سارى ءتۇستى جيلەت كيگەن، ال قالعان ەكى قىلمىسكەر T-max سكۋتەرىمەن كەلىپ توقتاعان. جۇمىسشىلاردىڭ كەيپىنە ەنىپ، كراننىڭ تۇمسىعىن ەكىنشى قاباتتاعى تەرەزەگە تىرەپ قويعان دا، سول اۋماقتى قۇرىلىس كونۋستارىمەن قورشاپ تاستاعان.
پاريج پروكۋرورى لاۋرا بەككونىڭ ايتۋىنشا، ودان كەيىن ەكى قاراقشى تەرەزەنى سىندىرىپ، مۇراجايعا ەنگەن. سودان سوڭ كۇزەتشىلەرگە قوقان-لوقى كورسەتىپ، دابىل جۇيەسىن وشىرگەن.
قىلمىسكەرلەر بىرنەشە زەرگەرلىك بۇيىمدى ۇرلاعان. كەيىن ولار جۇك ليفتىسىمەن تومەن ءتۇسىپ، جەرگىلىكتى ۋاقىت بويىنشا 9:38-دە سكۋتەرمەن ا6 اۆتوماگيسترالىنە قاراي تايىپ تۇرعان.
- ولار وتە شاپشاڭ ارەكەت ەتتى، ۇرلىق جەتى مينۋتتا جاسالدى، - دەدى ىشكى ىستەر ءمينيسترى لوران نۋنەس France Inter- ءدىڭ جەكسەنبى كۇنگى ەفيرىندە.
جەدەل تەرگەۋ بارىسىندا پوليتسيا وقيعا ورنىنان ەكى ۇشكىر تەگىستەۋىش ماشينا، دانەكەرلەيتىن لامپا، بەنزين، قولعاپ، راتسيا، كورپە جانە ەۆگەني پاتشايىمنىڭ زاقىمدالعان ءتاجىن تاپتى. ءبىراز ۋاقىتتان كەيىن قىلمىسكەرلەر وزدەرىن جۇمىسشى رەتىندە كورسەتۋ ءۇشىن قولدانعان سارى جيلەت تابىلدى، ول ۇرىلار قاشقان كەزدە ءتۇسىپ قالعان كورىنەدى.
لاۋرا بەككونىڭ پىكىرىنشە، بۇل فاكتىلەر ولاردىڭ «جاقسى دايىندالعانىن» جانە «توناۋدىڭ الدىن الا ۇيىمداستىرىلعانىن» كورسەتەدى.
- ءبىز بۇل توناۋدى ۇيىمداسقان، اۋىر قىلمىس دەپ ەسەپتەيمىز، قاۋىپسىزدىك كامەرالارىنان جازبالار بار، - دەدى پاريج پروكۋرورى.
ول سونداي-اق ءوزى «كومماندوس» دەپ اتايتىن ءتورت قىلمىسكەردىڭ ءالى دە بوستاندىقتا جۇرگەنىن ايتتى.
نە ۇرلاندى
ماريا-امەلي مەن گورتەنزيا پاتشايىمىنىڭ بەزەندىرىلگەن ديادەماسىنىڭ (ءتاجى) ەلەمەنتتەرى؛
ماريا- امەلي مەن گورتەنزيا پاتشايىمى اشەكەي بۇيىمدارى جيناعىنىڭ ىشىندەگى جاقۇت القا؛
ماريا-امەلي مەن گورتەنزيا پاتشايىمىنىڭ جاقۇتتان جاسالعان گارنيتۋراسىنان سىرعالار؛
ماري- لۋيزا گارنيتۋراسىنان جاسالعان ءزۇبارجات (يزۋمرۋد) القاسى؛
ماري-لۋيزا جيىنتىعىنان جاسالعان ءزۇبارجات سىرعالارى؛
قاسيەتتى تۇيرەۋىش دەپ اتالاتىن تانامونشاق؛
يمپەراتريتسا ەۆگەنيدىڭ تياراسى؛
يمپەراتريتسا ەۆگەنيدىڭ تۇيرەۋىشى (تانامونشاعى).
وسى 8 زەرگەرلىك بۇيىممەن قوسا قاراقشىلار III ناپولەوننىڭ ايەلىنىڭ ءتاجىن دە ۇرلاپ كەتتى. لۋۆر سايتىندا جاريالاعان سيپاتتاماعا سايكەس، بۇل ءتاج 1354 گاۋھار تاسپەن جانە 56 زۇبارجاتپەن بەزەندىرىلگەن، ءبىراق ول مۇراجايدىڭ سىرتىندا زاقىمدالعان كۇيىندە تابىلعان.
- لۋۆر - ءبىزدىڭ مادەنيەتىمىزدىڭ سيمۆولى. ۇرىلار فرانسيا پاتشالارىنىڭ زەرگەرلىك بۇيىمىن قولدى قىلدى، بۇل قىلمىستى «ءبىزدىڭ ەلىمىزدى ماسقارالاۋ» دەپ قابىلدايمىز، - دەدى X جەلىسىندە ۇلتتىق بىرلەستىكتىڭ پرەزيدەنتى دجوردان باردەللا.
بۇعان دەيىن ناپولەوننىڭ اشەكەيلەرى قولدى بولعانىن حابارلاعان ەدىك.
فرانسيا پرەزيدەنتى ەممانۋەل ماكرون ۇرلانعان بۇيىمداردى قايتارۋعا ءسوز بەردى.
