فرانسيادا پيكاسسو كارتيناسى لوتەرەيا ارقىلى ويناتىلادى

استانا. KAZINFORM - فرانسياداعى قايىرىمدىلىق لوتەرەياسى پيكاسسونىڭ كارتيناسىن 100 ەۋروعا ۇتىپ الۋ مۇمكىندىگىن ۇسىنادى. تۇسكەن قارجى التسگەيمەر اۋرۋىن زەرتتەۋگە جۇمسالادى.

پابلو پيكاسسو كارتينالارىنىڭ ءبىرى فرانسيادا قايىرىمدىلىق لوتەرەياسى ارقىلى ويناتىلماق.

لوتەرەيا 14-ساۋىردە Christie’s اۋكسيون ۇيىندە وتەدى. ويىنعا قويىلعان تۋىندى - «Tête dt Femme» («ايەل ءجۇزى»). كارتينا 1941 -جىلى سالىنعان.

مۇنداي اكسيا العاش رەت ۇيىمداستىرىلىپ وتىرعان جوق. 2013 -جىلى «100 ەۋروعا 1 پيكاسسو» جوباسى كەزىندە ا ق ش-تان كەلگەن ءورت ءسوندىرۋشى «وپەرا شلياپاسىن كيگەن ادام» (1914) كارتيناسىن ۇتىپ العان. 2020 -جىلى وسىنداي لوتەرەيانى يتاليا تۇرعىنى جەڭىپ، روجدەستۆوعا پيكاسسونىڭ ناتيۋرمورتتىن يەلەنگەن.

كوللەكتسيونەر دەۆيد ناحمادتىڭ ايتۋىنشا، بۇل باستامانى سۋرەتشىنىڭ ءوزى دە قولدار ەدى، سەبەبى پابلو پيكاسسو كوزى تىرىسىندە تۋىندىلارىن ءجيى سىيعا بەرىپ، ونەردى كەڭ اۋديتورياعا قولجەتىمدى ەتۋدى قالاعان.

بۇل اكتسيانى ۇيىمداستىرۋشى - التسگەيمەر اۋرۋىن زەرتتەيتىن قور. پاريجدەگى ءىرى مەملەكەتتىك اۋرۋحانالاردىڭ بىرىندە جۇمىس ىستەيتىن قور 2004 -جىلدان بەرى فرانسياداعى وسى باعىتتاعى ەڭ ءىرى جەكە عىلىمي ينۆەستورعا اينالعان.

ويىندا بارلىعى 120 مىڭعا دەيىن بيلەت ساتىلىپ، 12 ميلليون ەۋروعا دەيىن قاراجات جينالۋى مۇمكىن. ءتۇسىمنىڭ شامامەن 1 ميلليون ەۋروسى تۋىندى يەسى Opera Gallery-گە بەرىلەدى.

بۇعان دەيىنگى وسىنداي ەكى اكسيادا 10 ميلليون ەۋرودان استام قاراجات جيناپ، ليۆان مەن افريكا ەلدەرىندەگى مادەني جانە گۋمانيتارلىق جوبالارعا باعىتتالعان.

ەسكە سالايىق، بىلتىر جەلتوقسان ايىندا پاريجدەگى Christie’s دۇكەنىندە پيكاسسونىڭ وسى تۋىندىسى ساتىلىمعا قويىلعانى حابارلانعان بولاتىن. كارتينا شامامەن ءبىر ميلليون ەۋروعا باعالاندى.