فرانسيادا ەكىنشى رەت جارىق ءوشتى

استانا. KAZINFORM - فرانسيانىڭ ريۆەرا وڭىرىندە 48 ساعات ىشىندە ەكىنشى ءىرى ەلەكتر قۋاتىنىڭ ءۇزىلۋى تىركەلدى. بۇل جولى - نيتستساداعى قوسالقى ستانتسيادا جەكسەنبىگە قاراعان ءتۇنى شىققان ورتكە بايلانىستى جارىق ءسوندى، دەپ جازدى Oxu.Az BBC- گە سىلتەمە جاساپ.

الدىن الا باعالاۋعا قاراعاندا، بۇل وقيعا ادەيى جاسالعان ارەكەت بولۋى مۇمكىن. ءورت جەرگىلىكتى ۋاقىتپەن تۇنگى ساعات 2 شاماسىندا شىققان. ناتيجەسىندە 45000 ءۇي جارىقسىز قالدى.

ەلەكتر قۋاتىنىڭ ءۇزىلۋى نيتستسا اۋەجايىن، ترامۆاي جۇيەسىن جانە جاقىن ماڭداعى سەن- لوران- ديۋ- ۆار مەن كان- سيۋر- مەر ەلدى مەكەندەرىن دە قامتىدى. ەلەكتر قۋاتى تەك تاڭەرتەڭ قايتا قوسىلدى.

نيتستسا مەرى كريستيان ەستروزي بۇل وقيعانى قاتاڭ ايىپتاپ، ونى «ەلگە قارسى جاسالعان قىلمىستىق ارەكەت» دەپ اتادى. ال مەردىڭ ورىنباسارى گاەل نوفري ءورتتىڭ «قىلمىستىق سيپاتى بولۋى مۇمكىن» ەكەنىن مالىمدەدى. جەرگىلىكتى ب ا ق- تىڭ حابارلاۋىنشا، پوليتسيا وقيعا ورنىندا دوڭگەلەك ىزدەرىن جانە بۇزىلعان ەسىكتەردى انىقتاعان.

بۇل وقيعا كانن قالاسىندا ەلەكتر جارىعى ۇزىلگەننەن كەيىنگى كۇنى بولدى. وندا ءدال سول ۋاقىتتا حالىقارالىق كينوفەستيۆال ءوتىپ جاتقان. ول جەردە دە ءورت كۇدىگى بار: شامامەن 160000 ءۇي جارىقسىز قالىپ، بىرنەشە كينو كورسەتىلىم توقتاتىلعان. تەك گەنەراتورلارعا اۋىسۋ ارقىلى فەستيۆالدى جالعاستىرۋ مۇمكىن بولدى.

قازىرگى تاڭدا ەكى وقيعانىڭ ءبىر- بىرىمەن بايلانىسى بار ەكەنى رەسمي تۇردە راستالماعان.

ەسكە سالا كەتەيىك، بۇعان دەيىن فرانسيادا بلەكاۋت بولىپ، مىڭداعان ۇيلەر مەن كانن كينوفەستيۆالى جارىقسىز قالعانىن جازعان ەدىك.