فرانسيادا ءىرى ميتينگتەر ءوتتى
استانا. KAZIFORM - فرانسيا پوليسياسىنىڭ حابارلاۋىنشا، حالىقارالىق ەڭبەكشىلەر مەرەكەسىنە بايلانىستى ميتينگىگە 175 مىڭعا جۋىق، پاريجدە 32 مىڭ ادام قاتىستى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
1-مامىر فرانتسيانىڭ مەملەكەتتىك مەرەكەلەرىنىڭ ءبىرى. بۇل كۇن «ەڭبەك كۇنى» دەپ اتالادى. بۇل كۇنى ءداستۇرلى تۇردە ەلدەگى كاسىپوداق وكىلدەرىنىڭ قاتىسۋىمەن بۇقارالىق دەمونستراتسيالار وتەدى.
بيىل ءىرى مانيفەستاتسيالار پاريجدە، نانتتا جانە فرانسيانىڭ وزگە دە قالالارىندا ءوتتى. قاقتىعىستار دا بولدى.
وسى وقيعاعا بايلانىستى تاراعان حابارعا قاراعاندا، سوتسياليست بەلسەندىلەرگە شابۋىل جاسالعان. ولاردىڭ تورتەۋى جەڭىل جاراقات العان.
فرانسيا ىشكى ىستەر ءمينيسترى پاريجدە سوتسياليستىك پارتيا كەڭسەسى دەمونستارانتتاردىڭ اگرەسسيۆتى شابۋىلىنا ۇشىراعانىن حابارلادى.
- وقيعا ورنىنىڭ قاۋىپسىزدىگىن قامتاماسىز ەتىپ، بۇزاقىلاردى تۇتقىنداۋ ءۇشىن پوليسيا ارالاستى. مەن شابۋىل جاسالعان بەلسەندىلەردى تولىق قولدايتىنىمدى ايتقىم كەلەدى. ءبىز ەلىمىزدە راديكال سولشىلدار ۇيىمداستىرعىسى كەلەتىن ساياسي كۇش كورسەتۋگە جول بەرمەيمىز، - دەدى ول.
فرانسيا وپپوزيتسياسى دا ميتينگ وتكىزدى. «ۇلتتىق بىرلەستىك» ليدەرى مارين لە پەن ناربوننا قالاسىندا 8 مىڭ جاقتاۋشىلارىنىڭ الدىندا ءسوز سويلەدى. وڭشىل راديكال ساياساتكەر رەتىندە ول ە. ماكرون ساياساتىن سىنادى.
- جۇيە مەنىڭ پرەزيدەنت سايلاۋىنا تۇسۋىمە كەدەرگى كەلتىرگەنىمەن ەل بويىنشا مىڭداعان فرانسۋزدىڭ ارەكەت ەتىپ، قاتىسىپ، وزىنە جاۋاپكەرشىلىك الۋىنا كەدەرگى كەلتىرە المايدى، - دەدى.
ءساۋىر ايىنىڭ باسىندا فرانسيا سوتى «ۇلتتىق بىرلەستىك» ەڭ شەتكى پارتياسىنىڭ ليدەرى مارين لە پەندى ەۋروپالىق وداق قارجىسىنا زيان كەلتىردى دەپ ايىپتادى. بۇل وپپوزيتسيا ساياساتكەرىنىڭ جۋىرداعى پرەزيدەنت سايلاۋىنا تۇسۋىنە كەدەرگى بولۋى مۇمكىن.
وسىعان دەيىن فرانسيادا تۇرمەلەرگە شابۋىل جاساعان 25 ادام ۇستالعانى تۋرالى جازدىق.
