فرانسيادا 2025 -جىلدىڭ العاشقى ىستىق تولقىنى تىركەلدى
استانا. KAZINFORM - الداعى كۇندەرى فرانسيانىڭ ۇلكەن بولىگىندە تەمپەراتۋرا رەكوردتىق كورسەتكىشكە جەتىپ، 38°C دەيىن كوتەرىلەدى دەپ كۇتىلەدى، دەپ جازدى Kazinform اگەنتتىگىنىڭ ءتىلشىسى.
جەرگىلىكتى مەتەورولوگتاردىڭ ايتۋىنشا، بۇل - بيىلعى جازداعى ەرەكشە كۇشتى ىستىق كەزەڭ، ول ەۋروپاداعى جاھاندىق جىلىنۋدىڭ ناقتى كورىنىسى بولۋى ىقتيمال.
ءداستۇرلى «Fête de la Musique» مۋزىكا مەرەكەسى سەنبى، 21 -ماۋسىمدا وتەدى جانە بۇل كۇنى وتە ىستىق بولادى دەپ بولجانعان. وسىلايشا، فرانسۋزدار وسى ماۋسىمداعى العاشقى ەكسترەمالدى ىستىق تولقىنىمەن بەتپە- بەت كەلمەكشى.
- 19-ماۋسىم، بەيسەنبىدەن باستاپ بىرنەشە كۇن بويى جوعارى بولىپ تۇرعان اۋا تەمپەراتۋراسى بىرتىندەپ ءوسىپ، سەنبىدە شارىقتاۋ شەگىنە جەتەدى، - دەيدى Météo France.
- ەڭ الدىمەن ەلدىڭ باتىس بولىگى زارداپ شەگەدى، مۇندا تەمپەراتۋرا 34 تەن 38°C دەيىن كوتەرىلەدى. تۇندەر دە ىستىق بولادى، تروپيكالىق تۇندەر بولۋى مۇمكىن، ياعني تەمپەراتۋرا 20°C تان تومەن تۇسپەيدى.
Météo-France جۇما كۇنى ءۇشىن برەتان مەن وۆەرن- رونا- الپ ايماقتارىن قوسا العاندا، 16 دەپارتامەنتتە قىزعىلت سارى دەڭگەيدەگى دابىل جاريالادى. يسپانيا مەن ۇلىبريتانيا دا بۇل ىستىقتان زارداپ شەگۋى مۇمكىن.
بۇل ىستىق تولقىنى - بىرنەشە كۇن قاتارىنان قالىپتان تىس جوعارى تەمپەراتۋرا ساقتالاتىن قۇبىلىس - 1947 -جىلدان بەرى فرانسيادا تىركەلىپ وتىرعان ەلۋىنشى جاعداي بولىپ وتىر.
- بۇل جاڭا شىندىقتىڭ كورىنىسى سەكىلدى: ىستىق تولقىندارى جيىلەنىپ، قارقىنى كۇشەيىپ، جىل باسىندا دا، سوڭىندا دا پايدا بولىپ جاتىر، - دەيدى فرانسۋز كليماتولوگى.
- بۇرىن مۇنداي جاعداي بەس جىلدا ءبىر رەت بولاتىن دەپ ەسەپتەلەتىن. ەندى بۇل جىل سايىن، ءتىپتى ودان دا ءجيى بولىپ جاتىر.
1989-جىلعا دەيىن فرانسيادا جىل سايىن ورتا ەسەپپەن 1,7 كۇن عانا قاتتى ىستىق كۇندەر تىركەلسە، 2000- 2015 -جىلدار ارالىعىندا بۇل كورسەتكىش سەگىز كۇنگە جەتتى. سوڭعى ون جىلدا بۇل ورتاشا ەسەپپەن جىلىنا 9,4 كۇنگە دەيىن ءوستى.
عالىمدار ۇنەمى ەسكەرتىپ كەلەدى: كليماتتىڭ وزگەرۋى اپتاپ ىستىق، قۇرعاقشىلىق جانە سۋ تاسقىنى سياقتى ەكسترەمالدى اۋا رايى قۇبىلىستارىنىڭ جيىلەۋىنە جانە كۇشەيۋىنە الىپ كەلەدى.
