فرانسيا مەن يسپانيا رەسەيلىكتەر ءۇشىن ۆيزا تالاپتارىن قاتاڭداتتى
استانا. KAZINFORM - فرانسيا رەسەي مەن بەلارۋس ازاماتتارى ءۇشىن ءوزىنىڭ تەڭىز اۋماقتارىنا كىرۋ ەرەجەلەرىن قاتاڭداتتى. بۇل تۋرالى 16-ماۋسىم، دۇيسەنبى كۇنى رەسەي تۋروپەراتورلار قاۋىمداستىعى حابارلادى، دەپ جازدى DW.
بۇعان دەيىن اتالعان اۋماقتارعا بارۋ ءۇشىن رەسەيلىكتەر مەن بەلارۋستىقتارعا 6 ايدان كەم ەمەس مەرزىمگە بەرىلگەن فرانسۋزدىڭ C ساناتىنداعى كوپ مۋلتيۆيزاسى جەتكىلىكتى بولسا، ەندى ارنايى DFA ۆيزاسىن راسىمدەۋ قاجەت.
ال يسپانيا رەسەي ازاماتتارىنان يسپان اۋەجايلارىندا اۋىسىپ ءمىنۋ كەزىندە ترانزيتتىك ۆيزا تالاپ ەتپەكشى.
اڭگىمە كەلەسى اۋماقتار تۋرالى بولىپ وتىر: فرانتسۋز پولينەزياسى، جاڭا كالەدونيا، ۋولليس پەن فۋتۋنا، گۆادەلۋپا، مارتينيكا، سەن-مارتەن، سەن-بارتەلەمي، رەيۋنون، مايوتتا، فرانتسۋز گۆياناسى، سەن- پەر مەن ميكەلون.
جاڭا تالاپتار ۇزاق مەرزىمدى D ساناتىنداعى فرانتسۋز ۆيزاسى بارلارعا، سونداي- اق شەنگەن ايماعى مەن ەۋروپالىق ەكونوميكالىق ايماق ەلدەرىندە تۇرۋعا رۇقساتى بار ازاماتتارعا قاتىستى ەمەس. (ە ە ا قۇرامىنا ەو ەلدەرىمەن قاتار يسلانديا، نورۆەگيا جانە ليحتەنشتەين كىرەدى.)
يسپانيا رەسەيلىكتەر ءۇشىن ترانزيتتىك ۆيزالاردى ەنگىزەدى
2024 -جىلدىڭ 12- شىلدەسىنەن باستاپ يسپانيانىڭ حالىقارالىق اۋەجايلارىندا اۋىسىپ مىنەتىن رەسەي ازاماتتارى ءۇشىن TAP ساناتىنداعى ترانزيتتىك ۆيزانى راسىمدەۋ مىندەتتى بولادى. بۇل تۋرالى يسپانيانىڭ ماسكەۋدەگى كونسۋلدىعى ءوز سايتىندا جاريالادى. بۇل تالاپ شەنگەن ۆيزاسى بار نەمەسە ەۋرووداق ەلدەرىندە تۇرۋعا رۇقساتى بار ازاماتتارعا قولدانىلمايدى.
ايتا كەتەيىك، 2022 -جىلدىڭ قاراشاسىندا چەحيا، ال 2023 -جىلدىڭ قىركۇيەگىندە ۇلىبريتانيا رەسەيلىكتەر ءۇشىن اۋەجايلىق ترانزيتتىك ۆيزالاردى ەنگىزگەن بولاتىن. سونىمەن قاتار، رەسەي ازاماتتارىنا فرانسيا ارقىلى ترانزيتپەن ۇشۋ ءۇشىن دە ۆيزا قاجەت، ەگەر ولار ارمەنيا، ازەربايجان، بەلارۋس، گرۋزيا، مىسىر، مولدوۆا، تۇركيا نەمەسە ۋكراينادان ۇشاتىن بولسا.
2024 -جىلدىڭ مامىر ايىندا نورۆەگيا رەسەيلىك تۋريستەرگە ەلگە كىرۋگە دە، باسقا شەنگەن ەلدەرىنە ترانزيت ارقىلى وتۋلەرىنە دە تىيىم سالدى.
ەسكە سالا كەتەيىك، قازاقستانعا 87 ەلدىڭ ازاماتى ۆيزاسىز كەلە الادى.
