فارماتسيەۆتيكا سالاسىنا اۋديت: 5 ءىس باس پروكۋراتۋراعا جولداندى

استانا. KAZINFORM - ەلىمىزدە فارماتسيەۆتيكا سالاسىنا جۇرگىزىلگەن اۋديت قورىتىندىسى بويىنشا 5 ءىس باس پروكۋراتۋراعا جولداندى. بۇل تۋرالى ق ر جوعارعى اۋديتورلىق پالاتاسىنىڭ ءتوراعاسى ءاليحان سمايىلوۆ ايتتى.

ءماجىلىستىڭ جالپى وتىرىسىندا دەپۋتات مۇرات ابەنوۆ ق ر جوعارعى اۋديتورلىق پالاتا ءتوراعاسىنان ءدارى-دارمەك باعاسىن شامادان تىس كوتەرۋ فاكتىسىنە كىم جاۋاپ بەرەتىنىن سۇرادى.

- 5 ماتەريالدى ءبىز قۇقىق قورعاۋ ورگاندارىنا جىبەردىك. باس پروكۋراتۋرا ءوز باعاسىن بەرەدى. ارى قاراي ءتيىستى قۇقىق قورعاۋ ورگاندارىنا تەرگەۋ جۇرگىزۋ ءۇشىن جىبەرەدى دەپ ويلايمىز، - دەپ جاۋاپ بەردى ءاليحان سمايىلوۆ.

بۇل ساۋالعا قوسىمشا ق ر دەنساۋلىق ساقتاۋ ۆيتسە-ءمينيسترى ەرجان نۇرلىبايەۆ تا جاۋاپ بەردى.

- دەنساۋلىق ساقتاۋ مينيسترلىگىنىڭ ءدارى-دارمەك ساياساتى دەپارتامەنتى وزگە مەملەكەتتىك اتقارۋشى ورگان وكىلدەرىمەن بىرلەسە وتىرىپ جاڭا شەكتى باعا مودەلىن قۇرۋعا جاۋاپتى جۇمىس توبىن قۇردى. ول توپتى ءوزىم باسقارامىن، - دەدى ۆيتسە-مينيستر.

ايتا كەتەيىك، بۇعان دەيىن ق ر دەنساۋلىق ساقتاۋ ءمينيسترى مىندەتىن اتقارۋشى ارداق امانگەلدى ۇلى «2029 -جىلعا دەيىن وتاندىق ءدارى-دارمەك كولەمى 50 پايىزعا جەتە مە؟» دەگەن ساۋالعا جاۋاپ بەردى.

اۆتور

ەربول جانات