شىركەي تۇركىستانعا دا جەتتى

تۇركىستان. KAZINFORM - قازىرگى تاڭدا قالاداعى جاسىل جەلەك تولىعىمەن دارىلەنىپ جاتىر. تۇركىستان وبلىسىندا بىرنەشە اۋىل تۇرعىندارىن شىركەي ابىگەرگە سالىپ تۇر. اسىرەسە، وتىرارلىقتار كۇندىز دەنەسىن قىمتاپ، بەتىن تورمەن جاۋىپ تۇراتىن باس كيىم كيۋگە ءماجبۇر.

قازىر شىركەيلەر وبلىس ورتالىعى تۇركىستان قالاسىندا دا كەزدەسە باستادى. بۇل تۋرالى ماريام ءابساتتار ەسىمدى جۋرناليست الەۋمەتتىك جەلىگە «تۇركىستاندا شىركەي كوبەيىپ كەتىپتى…» دەپ جازدى.

ال، تيمۋرحان نازاروۆ ەسىمدى تۇرعىن «اسىلىندا شىركەي مىنا سىرداريا بويىندا، ياكي وزەن بويلارىندا بولۋشى ەدى، قالادا ءجۇرىپ ءبىر ورىندا تۇرا المايسىڭ» دەگەن پىكىر قالدىردى.

قوعام بەلسەندىسى عاني نازاربەك شىركەي تالاپ جاتقانىن جەتكىزسە، رومان بۇرقاش «كەشكىسىن جۇرە الماي قالدىق» دەگەن پىكىر ايتتى.

قالا اكىمدىگىنىڭ مالىمەتىنە سۇيەنسەك، شىركەيمەن كۇرەس باعىتىنداعى دارىلەۋ جۇمىسىنا بارلىعى 6 تەحنيكا، 10 عا جۋىق مامان جۇمىلدىرىلعان.

شىركەيگە قارسى فيپرون، كاردينال جانە تيامەترين سىندى دارىلەرى قولدانىلۋدا.

«بۇگىنگە دەيىن قالانىڭ نەگىزگى ورتالىق كوشەلەرى، اكىمشىلىك-ىسكەرلىك، مادەني-رۋحاني اۋماعى مەن ب. ساتتارحانوۆ داڭعىلى، 9-شى جانە 11-كوشەلەر تولىقتاي دارىلەندى. شىركەيلەرگە قارسى دارىلەۋ جۇمىستارى وبلىس ورتالىعىندا ۇزدىكسىز جۇرگىزىلۋدە. دەزينسەكسيا جۇمىستارى بۇگىندە ساياباقتار مەن كوشە بويلارىندا جانە شاھاردىڭ كوگالدى دەمالىس اۋماقتارىندا جاسالىپ جاتىر» دەلىنگەن اكىمدىك تاراپىنان بەرىلگەن اقپاراتتا.