شىمكەنتتىك جاۋىز ەمشىگە 6 بالانى اسىراپ الۋعا كىم رۇقسات بەرگەن
استانا. KAZINFORM - شىمكەنتتىك ەمشى اسىراپ العان 6 بالاسىن قورلاپ، ازاپتادى دەگەن كۇدىكپەن قاماۋدا وتىر. بالالاردىڭ ەلدىڭ ءتۇرلى قالالارىنان اسىراپ الىنعانى بەلگىلى بولدى.
ەمشىنىڭ قاتىگەز ارەكەتى ۇزاق ۋاقىت بويى قالايشا اشىلماعانى، بالالاردى قانداي نەگىزدە اسىراپ العانى ازىرگە بەلگىسىز.
بۇعان دەيىن وگەي اكەنىڭ 2021 -جىلى اسىراپ العان 6 بالانى قورلىقتا ۇستاعانى تۋرالى دەرەك تاراعان.
بالالاردىڭ ۇلكەنى وگەي اكەنىڭ ولاردى اش ۇستاپ، مىسىق پەن ءيتتىڭ ەتىمەن عانا ازىقتاندىرعانىن ايتىپ، كومەك سۇراعان.
تەكسەرۋشىلەر اتالمىش ۇيدەن لاس جاعدايدا ءومىر ءسۇرىپ جاتقان، ابدەن ازىپ- توزعان، دەنەسىندە كوگەرگەن، قىزارعان ءىز بار بالالاردى تاپقان.
«كوز الدىمىزداعى كورىنىستەن ەسەڭگىرەپ قالعانداي بولدىق. بالالار ازىپ- توزعان، دەنەلەرى كوگەرگەن، كۇتىمسىز، لاس. ول ۇيگە تۇتاس كوميسسيا بولىپ بارعانبىز. جاعدايدا كورگەن ساتتە-اق بالالاردى ۋاقىتشا بولسا دا اسىراۋشىدان الىپ قويۋ كەرەكتىگىن تۇسىندىك. ولاردى وندا قالدىرۋ ءقاۋىپتى ەدى. ءار بالانىڭ ۇستىندە قوس قاباتتان كىر سىڭگەن كيىم بولدى. بەسەۋى ءتىپتى سويلەي المايدى دەسە دە بولادى. بالالاردىڭ دەنەسىندەگى كوگەرگەن ىزدەردى اتا-اناسى ويناپ ءجۇرىپ تۇسىرگەن شىعار دەپ تۇسىندىرمەك بولدى»، - دەيدى شىمكەنت قالاسىنداعى بالا قۇقىقتارى جونىندەگى ۋاكىل جاننەتا جازىقبايەۆا.
ونىڭ مالىمەتى بويىنشا، بالا اسىراپ العان ەرلى-زايىپتىنىڭ ءوز كىندىگىنەن نارەستە جوق كورىنەدى.
3 تەن 15 جاسقا دەيىنگى ارالىقتاعى 6 بالانى شىمكەنت، الماتى، استانا، وسكەمەن قالالارىنداعى ءتۇردى بالالار ۇيىنەن جيناپ العان.
التاۋدىڭ ىشىندەگى ءبىر قىز بەن ۇل عانا رەسمي اسىراپ الىنعان. قالعانىنا قامقورلىق راسىمدەگەن.
«كەلەشەكتە تاعى بىرنەشە بالانى بالالار ۇيىنەن اسىراپ الۋدى جوسپارلاعان»، - دەيدى جاننەتا جازىقبايەۆا.
وتاعاسى ءوزىن حالىق ەمشىسى دەپ اتايدى. YouTube-تەگى ارناسىندا بىرنەشە ءجۇز وقىرمانى بار. (Kazinform سوت ۇكىمىنە دەيىن كۇدىكتىنىڭ دەرەكتەرىن جاريالاي المايدى).
بالالاردىڭ مۇشكىل ءحالىن، ۇيدەگى جاعدايلارى ءتيىستى دەڭگەيدە ەمەستىگىن كورشىلەرىنىڭ دە، مۇعالىمدەرى مەن سول اۋماققا جاۋاپتى ۋچاسكەلىك پوليتسەيدىڭ دە حابارلاماعانى سۇراق تۋدىرادى.
قازىر 6 بالانىڭ ەكەۋى كامەلەتكە تولماعانداردىڭ بەيىمدەۋ ورتالىعىندا. قالعان تورتەۋى بوبەكتەر ۇيىندە. ال وگەي اكەنىڭ ۇستىنەن بىرنەشە باپ بويىنشا قىلمىستىق ءىس قوزعالعان.
«ءىس قىلمىستىق ىستەر جونىندەگى سوتتا جاتىر. بىرنەشە باپ بويىنشا ايىپ تاعىلىپ وتىر. ونىڭ ىشىندە «ازاپتاۋ» بابى دا بار. بالالاردى اسىراپ العان ەر ادام قاماۋدا»، - دەپ ءمالىم ەتتى شىمكەنت قالاسىنىڭ پوليتسيا دەپارتامەنتى.
جاعا ۇستاتارلىق وقيعا تۋرالى بالا قۇقىقتارى جونىندەگى ۋاكىل دينارا زاكيەۆا دا پىكىر ءبىلدىردى.
«شىمكەنتتەگى اسىراندى بالالاردى ازاپتاۋ فاكتىسى بويىنشا ايتساق، اتالعان قىلمىس بويىنشا اقپان ايىندا ىشكى ىستەر مينيسترلىگىمەن بىرگە جۇمىس ىستەگەن بولاتىنبىز. ول ءىستىڭ ءمان-جايىندا قورقىنىشتى جايتتار جەتەرلىك. بالالاردىڭ ۇلكەنىنىڭ ايتۋىنشا، ولارعا ءزار مەن ءناجىس جەگىزگەن. ءىس سوتقا جولداندى. سونداي-اق، بالالاردىڭ ۇلكەنىنىڭ جيناعىنداعى اقشانىڭ جۇمسالۋىنا قاتىستى ءىس تەرگەلىپ جاتىر. ونىڭ اقشاسىنا ەشكى ساتىپ الىپ، ۇلدىڭ وزىنە باقتىرىپ قويعان بولۋى مۇمكىن»، - دينارا زاكيەۆا.
ومبۋدسمەن بالالاردىڭ دەنەسىندەگى كوگەرگەن ىزدەرگە ءمان بەرمەگەن پەداگوگتەر مەن قامقورلىق ورگاندارىنىڭ وكىلدەرىنەن دە جاۋاپ الىنعانىن ايتادى.
«ولاردىڭ ۇستىنەن دە قىلمىستىق ءىس قوزعالدى. تەرگەۋ ءجۇرىپ جاتىر. بۇل سوڭعى بىرنەشە ايدا بالا اسىراپ العان ۇيلەردە تىركەلگەن ءتورتىنشى ازاپتاۋ فاكتىسى. وسىعان بايلانىستى پرەزيدەنت اكىمشىلىگى بۇكىل وڭىرلەردەگى اكىمدىكتەرمەن جينالىس وتكىزىپ، ناتيجەسىندە ناۋرىز ايىنان بەرى بالا اسىراپ العان وتباسىلاردىڭ بارىندە رەيد جۇرگىزىلىپ جاتىر، شىلدەدە ءبىتۋى كەرەك»، - دەدى ومبۋدسمەن.
Kazinform اگەنتتىگى وسى ءىس بويىنشا قامقورلىق ورگاندارى مەن ءبىلىم بەرۋ مەكەمەلەرىنە، پوليتسياعا ساۋال جولدادى.
اۆتور
ەسىمجان ناقتىباي
