شىمكەنتتەگى جەڭىل ونەركاسىپ ءوندىرىسى تومەندەپ بارادى

استانا. KAZINFORM - شىمكەنتتە جەڭىل ونەركاسىپ سالاسى قۇلدىراپ بارادى. بىلتىرعى ءوندىرىس كولەمى %18- عا قىسقارعان. مامانداردىڭ ايتۋىنشا، بۇعان ەكى ءىرى زاۋىتتىڭ جۇمىسىن توقتاتۋى سەبەپ بولعان.

ويتكەنى جاھانداعى گەوساياسي احۋالدىڭ ۋشىعۋى قوس كاسىپورىنعا وڭاي تيمەدى. ال ىشكى نارىق ارزان يمپورتتىق تاۋارلارعا تولى. بۇل ەلىمىزدەگى ءىرى توقىما كاسىپورىندارىنىڭ ءبىرى. بۇرىن ونداعان ستانوك تىنىمسىز جۇمىس ىستەگەن عيماراتتا قازىر مۇلگىگەن تىنىشتىق.

مۇندا وندىرىلگەن ءونىم ءبىر كەزدەرى ىشكى نارىقتى قامتىپ قانا قويماي، رەسەي مەن تۇركياعا دا ەكسپورتتالىپ ەدى. ماقتا وسىرۋدەن باستاپ دايىن ءونىم شىعارۋعا تولىق مۇمكىندىگى بار كاسىپورىننىڭ جۇمىسى قازىر توقتاپ تۇر.

بەكەت تۇرسىنحانوۆ، فابريكا ديرەكتورى:

- كاسىپورىننىڭ توقتاۋىنىڭ سەبەپتەرىنىڭ بىرەۋى 2022 -جىلى رەسەي مەن ۋكراينا تەرريتورياسىندا باستالعان اسكەري وپەراتسياسىنا بايلانىستى ءبىزدىڭ سىرتقا شىعاراتىن ءونىم جولدارىنىڭ بۇعاتتالۋىنا بايلانىستى. ءبىز ءوزىمىز وندىرگەن ماتانىڭ 50 پايىزىن، 70 پايىزىنا دەيىن ەۋرووداق مەملەكەتتەرىنە جىبەرىپ وتىرعان بولاتىنبىز. ونىڭ ءبارى توقتادى.

ءونىمدى ىشكى نارىققا ساتۋ وڭاي ەمەس، دەيدى فابريكا ديرەكتورى. قازىر ساۋدا ورىندارى ارزان يمپورتتىق تاۋارعا تولى. ال وتاندىق وندىرۋشىلەر ءۇشىن ولاردىڭ ورنىن باسۋ قيىن. بۇل سالا تەندەرلەرگە تاۋەلدى بولعاننان كەيىن دە دامۋى تەجەلەدى، دەيدى ساراپشىلار.

گۇلميرا تاعايەۆا، جەڭىل ونەركاسىپ جانە سەرۆيس كوللەدجىنىڭ ديرەكتورى:

- وكىنىشكە وراي، بىزدەگى كوپتەگەن كاسىپورىن تەندەرگە تاۋەلدى. ەگەر ولار تەندەردى ۇتسا، ارينە، جۇمىسى توقتامايدى. تەندەر بولماسا، ءوندىرىس تۇرالايدى. بۇل كۇردەلى ماسەلە. ال ەندى تەندەرگە تاۋەلسىز كاسىپورىنداردىڭ سانى ساۋساقپەن سانارلىق.

رەسمي مالىمەت بويىنشا شىمكەنتتە 175 توقىما ءوندىرىسى جۇمىس ىستەيدى. ولار بىلتىر جالپى قۇنى 36 ميلليارد تەڭگەگە ءونىم شىعاردى. دەگەنمەن، ەكى ءىرى زاۋىتتىڭ جابىلۋى كورسەتكىشتەردى تومەندەتىپ وتىر. جەڭىل ونەركاسىپ سالاسىنىڭ كۇردەلى ەكەنىن جەرگىلىكتى بيلىك ەسكەرىپ، كاسىپورىنداردى قولداۋ ماقساتىندا جول كارتاسىن ازىرلەگەن.

ەرمەك تۇرمانوۆ، قالالىق كاسىپكەرلىك باسقارماسى باسشىسىنىڭ ورىنباسارى:

- بيىلعى جىلى ءبىز بۇل كاسىپورىنداردى ىسكە قوسۋ بويىنشا جول كارتاسىن ازىرلەدىك. كاسىپورىن باسشىلارىمەن بىرگە كەلىسىلدى. قازىرگى تاڭدا ونەركاسىپ جانە قۇرىلىس مينيسترلىگىنە كەلىسىمگە جولداندى. بۇل ەكى كاسىپورىندى بيىلعى جىلدىڭ قىركۇيەك-قازان ايلارىندا ىسكە قوسۋ جوسپارلانىپ وتىر.

ءبىر زاۋىتتىڭ جۇمىسى تولىعىمەن توقتادى. ال ەكىنشىسى سوڭعى تاپسىرىستاردى اياقتاۋعا جاقىن. كاسىپورىن باسشىلىعىنىڭ ايتۋىنشا، جالاقى تولەنىپ، كوممۋنالدىق قىزمەتتەر ءۇشىن قارىز وتەلگەن. ءبىراق بانكتەر الدىنداعى نەسيە كولەمى 3 ميلليارد تەڭگەگە جۋىقتايدى. جۇمىسشىلار كاسىپورىننىڭ قايتا جانداناتىنىنا ۇمىتپەن قاراپ وتىر.

24.kz