شىمكەنتتەن استاناعا ۇشىپ كەلگەن ۇشاققا قۇستار سوقتىعىسىپ قالدى

استانا. KAZINFORM - قۇستاردىڭ سوقتىعىسىپ قالۋىنان ۇشاقتىڭ بولشەگى زاقىمدالدى. بۇل تۋرالى SCAT اۋە كومپانياسىنىڭ باسپا ءسوز قىزمەتى حابارلايدى.

- «شىمكەنت - استانا» اۋە رەيسى قونعان كەزدە ۇشاقپەن قۇستار سوقتىعىسىپ قالدى. ۇشاقتىڭ زاقىمدالعان بولشەگىن اۋىستىرۋعا بايلانىستى، كۇتۋ كەرەكتىگىن ەسكەرتە وتىرىپ، «استانا - شىمكەنت» باعىتى بويىنشا ۇشۋى ءتيىس جولاۋشىلار قوناقۇيگە ورنالاستىرىلىپ، تاماقپەن قامتىلدى، - دەلىنگەن حابارلامادا.

وسى ورايدا اتالعان اۋە كومپانياسى باستى باسىمدىق - جولاۋشىلاردىڭ قاۋىپسىزدىگى ەكەنىن حابارلاپ وتىر.

- كومپانيا قۇستاردىڭ ۇشۋ باعىتىنا اسەر ەتە المايدى، سوندىقتان وسىنداي جاعدايدا رەيس كەستەسىنىڭ وزگەرۋىنە تۇسىنىستىكپەن قاراۋلارىڭىزدى سۇرايمىز، - دەيدى اۋە كومپانياسىنان.

ايتا كەتسەك، قۇستاردىڭ كەسىرىنەن ۇشاقتىڭ قايتا قونۋى، كەشىگۋى بولىپ تۇراتىن جايت. بىرنەشە جىل بۇرىن اتىراۋدان ەلورداعا باعىت العان ۇشاق قۇستاردىڭ كەسىرىنەن اۋەجايعا قايتا قونعان ەدى.

ودان بولەك، الماتىدان ەلورداعا بەت العان ۇشاق قوزعالتقىشىنا قۇستار تۇسكەن.

اۆتور

داۋلەت ىزتىلەۋ