پاريج وليمپياداسىندا قازاقستاندىق تورەشىلەر دە قازىلىق ەتەدى
استانا. KAZINFORM - بۇكىل الەم ەندى ون كۇننەن كەيىن فرانسيا استاناسى پاريج قالاسىندا وتەتىن XXXIII جازعى وليمپيادا ويىندارىنا كوز تىكپەك. ءتورتجىلدىقتىڭ باستى دوداسىنا سپورتشىلار قىزۋ دايىندىق ۇستىندە. ال جەر جۇزىلىك جارىستا اتلەتتەردەن بولەك ءبىز نازار اۋداراتىن تاعى ءبىر مارتەبەلى ماماندار بار. ولار - تورەشىلەر.
پاريج وليمپياداسىندا تورەلىك ەتەتىن قازىلار اراسىندا قازاقستاندىق ماماندار دا جوق ەمەس.
بۇگىن ق ر ۇلتتىق وليمپيادالىق كوميتەتى سول تورەشىلەر جايىندا دەرەكتەرمەن ءبولىستى.
ق ر ۇلتتىق وليمپيادالىق كوميتەتىنىڭ باسپا ءسوز قىزمەتى تاراتقان مالىمەت بويىنشا، قازاقستاننان پاريج وليمپياداسىندا 12 قازاقستاندىق مامان تورەلىك جاسايدى.
ولار: الۋا بەكتۇروۆا (كوركەم گيمناستيكا)، ولگا سولوۆيەۆا (اۋىر اتلەتيكا)، ءاليا كاريموۆا (ارتىستىك ءجۇزۋ)، يۋليا يگناتچەنكو، مەرۋەرت قاۋكەيەۆا (تەننيس)، تيمۋر امىربەكوۆ (سپورتتىق گيمناستيكا)، ەۆگەني دياكوكين (سەمسەرلەسۋ، سابليا)، ەۆگەني ميحەيەۆ (باسكەتبول)، ەرىك جۇمابەكوۆ، يگور ليگاي (كۇرەس)، الىشەر التايەۆ، ەرمەك سۇيەنىش (بوكس).
وليمپيادا ويىندارىندا تورەلىك ەتۋ ۇلكەن بىلىكتى تالاپ ەتەدى. ودان بولەك، حالىقارالىق فەدەراتسيالار جازعى ويىندارعا باراتىن ءادىل-قازىلاردى قاتال ىرىكتەۋدەن وتكىزەدى. الەمدىك ۇيىمنىڭ سىناعىنان سۇرىنبەي ءوتىپ، سايدىڭ تاسىنداي ىرىكتەلگەن ماماندار عانا ەڭ مارتەبەلى جارىس - وليمپيادا ويىندارىندا قىزمەت ەتە الادى.
ەندى سول تورەشىلەرىمىزدى قىسقاشا تانىستىرىپ وتسەك.
قازاقستاندىق تورەشى تيمۋر امىربەكوۆ وسىمەن ءوزىنىڭ ءتورتىنشى وليمپياداسىنا اتتانادى. سپورتتىق گيمناستيكانىڭ حاس شەبەرى بۇعان دەيىن 3 وليمپيادا ويىندارى مەن 18 الەم چەمپيوناتىندا تورەلىك ەتكەن. ال امىربەكوۆ قازىلىق جاساعان ازيا چەمپيوناتتارى مەن الەم كۋبوگىنىڭ سانىندا ەسەپ جوق.
كۇرەس تۇرلەرىنەن وليمپيادالىق دەڭگەيدەگى ەكى تورەشىمىز جازعى ويىنداردا جۇمىس ىستەيدى. ولار - ەرىك جۇمابەكوۆ پەن يگور ليگاي.
ەرىك جۇمابەكوۆ ءتورت الەم چەمپيوناتىندا تورەلىك ەتكەن. تاجىريبەلى مامان وليمپيادادا العاش رەت قازىلىق جاسايدى. ول 2019 -جىلى استانادا، 2021 -جىلى وسلودا (نورۆەگيا)، 2022-2023 -جىلدارى بەلگرادتا (سەربيا) وتكەن الەم چەمپيوناتتارىندا جانە 15-كە جۋىق ازيا بىرىنشىلىگىندە تورەشىلىك مىندەتتى ابىرويمەن اتقارعان.
ال قازاقستاندىق تورەشى الۋا بەكتۇروۆا پاريج وليمپياداسىندا كوركەم گيمناستيكا شەبەرلەرىنىڭ ونەرىنە باعالاۋشى بولماق. بەكتۇروۆا كوركەم گيمناستيكادان حالىقارالىق ساناتتاعى تورەشى. ول جەكەلەي جانە توپتىق جاتتىعۋداعى سپورتشىلاردىڭ ونەرىنە تورەلىك ەتدى.
الۋا بۇعان دەيىن بۋەنوس-ايرەستەگى (2018) جاسوسپىرىمدەر وليمپياداسىندا قازىلىق جاساپ، توكيو وليمپياداسىنا رەزەرۆتەگى تورەشى رەتىندە شاقىرتىلعان. ول بۇگىنگە دەيىن الەم چەمپيوناتتارى مەن الەم كۋبوگى كەزەڭدەرىندە جۇمىس ىستەپ كەلدى. ال وليمپيادا ويىندارىندا العاش رەت قازىلىق جاساماقشى.
قازاقستاندىق مامان سوڭعى وليمپيادالىق سيكلدە، ياعني، 2020-2024 -جىلدار ارالىعىندا ەكى الەم چەمپيوناتى مەن الەم كۋبوگىنىڭ بارلىق كەزەڭىندە تورەلىك ەتكەن.
ونىڭ ىشىندە، يسپانيانىڭ ۆالەنسيا قالاسىندا وتكەن ليتسەنزيالىق الەم بىرىنشىلىگى دە بار. بۇگىندە الۋا بەكتۇروۆا پاريج ويىندارىنا توقتاۋسىز دايىندالىپ جاتىر.
اۆتور
كۇنسۇلتان وتارباي
