شىمكەنتتە سالماعى 7 كەلى الىپ ءسابي دۇنيەگە كەلدى

شىمكەنت. قازاقپارات - 41 جاستاعى انا 7 كەلىگە جۋىق ءسابيدى دۇنيەگە الىپ كەلدى.

شىمكەنت قالالىق 2-اۋرۋحانانىڭ پەرزەنتحاناسىندا 41 جاستاعى انا تابيعي جولمەن، ەشقانداي اسقىنۋسىز 6700 گرام سالماقتاعى ءسابيدى ومىرگە اكەلدى. بۇل - ەلىمىزدە سيرەك كەزدەسەتىن جاعداي. ۇل بالا وتباسىنداعى التىنشى پەرزەنت اتانىپ وتىر. كوپبالالى انا بۇعان دەيىن ءتورت ۇل، ءبىر قىز بوسانعان.

- قازىر انانىڭ دا، بالانىڭ دا جاعدايى جاقسى. ەڭ تاڭعالارلىعى - الىپ بالانى اناسى ءوزى بوسانىپ، وتا دا، كۇردەلى ارالاسۋ دا قاجەت بولمادى، - دەلىنگەن شىمكەنت قالاسى دەنساۋلىق ساقتاۋ باسقارماسىنىڭ باسپا ءسوز قىزمەتى تاراتقان اقپاراتتا.

ايتا كەتەيىك، جىل باسىنان بەرى شىمكەنتتە جىل باسىنان بەرى 6719 ءسابي دۇنيەگە كەلگەن. ونىڭ ىشىندە 3271 قىز بالا، 3448 ۇل بالا بار.

ەسكە سالايىق، بۇدان بۇرىن شىمكەنتتە ءبىر اپتادا ەكى بۇيرەك ترانسپلانتاتسياسى جاسالعانىن جازعان بولاتىنبىز.

اۆتور

قايرات زاينيشەۆ