شىمكەنتتە رۋسلان بەردەنوۆكە قاستاندىق جاساۋ ءىسى بويىنشا سوت باستالدى

شىمكەنت. KAZINFORM - شىمكەنت قالاسى اكىمىنىڭ ورىنباسارى رۋسلان بەردەنوۆكە قاستاندىق جاساۋ فاكتىسى بويىنشا سوت پروتسەسى باستالدى.

ءىس شىمكەنت قالاسىنداعى قىلمىستىق ىستەر جونىندەگى مامانداندىرىلعان اۋدانارالىق سوتتا قارالىپ جاتىر. باستى ايىپتالۋشى بۇعان دەيىن «تۇرعىن ءۇي شىمكەنت» ج ش س-ىن باسقارعان ەرنار جيەنباي. ال، ءىستى سۋديا ءابىنۇر قارابايەۆ قاراپ جاتىر. سوت وتىرىسى مەملەكەتتىك تىلدە، اشىق فورماتتا ءوتىپ جاتىر. دەگەنمەن، سۋديا ايىپتالۋشى ەرنار جيەنبايدى بەينەجازباعا تۇسىرۋگە تىيىم سالدى.

ەرنار جيەنبايعا قىلمىستىق كودەكستىڭ ەكى بابى، ياعني 24-باپتىڭ 3-بولىگى («قىلمىسقا دايىندالۋ جانە قىلمىس جاساۋعا وقتالۋ»)، 99-باپتىڭ 1-بولىگى («ادام ءولتىرۋ») بويىنشا ايىپ تاعىلىپ وتىر.

رۋسلان بەردەنوۆكە قارۋلى شابۋىل بيىلعى 21-ساۋىردە اكىمدىك عيماراتىنىڭ جانىندا جاسالعان بولاتىن. بۇل - ونىڭ قالا اكىمىنىڭ ورىنباسارى قىزمەتىنە تاعايىندالعانىنا ەكى اي عانا بولعان ۋاقىت. بۇعان دەيىن رۋسلان بەردەنوۆ پارلامەنت ءماجىلىسىنىڭ دەپۋتاتى بولدى.

ايتا كەتەيىك، بۇدان بۇرىن رۋسلان بەردەنوۆكە جاسالعان قاستاندىق تۋرالى ءىس سوتقا جولدانعانىن جازعان بولاتىنبىز.

21-ساۋىردە شىمكەنت اكىمىنىڭ ورىنباسارى رۋسلان بەردەنوۆكە قاستاندىق جاسالعانى ءمالىم بولعان.

ول جاراقات الىپ، اۋرۋحاناعا ءتۇستى.