شىمكەنتتە جىلان كوبەيىپ كەتتى

شىمكەنت. KAZINFORM - اۋلادان جىلان شىقسا بىردەن 112 نومىرىنە حابارلاسۋ قاجەت.

جىل باسىنان بەرى شىمكەنتتىك قۇتقارۋشىلار جىلان شىقتى دەگەن قوڭىراۋمەن 25 مارتە شاقىرتۋعا بارعان.

بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 9 عا كوپ. ياعني، بىلتىر وسى ارالىقتا قۇتقارۋشىلار 16 رەت جىلان ۇستاۋعا شاقىرتۋ العان.

شىمكەنت قالاسى توتەنشە جاعدايلار دەپارتامەنتىنىڭ ماماندارى تۇرعىندارعا جىلاندى كورگەن كەزدە الشاق بولۋعا، ءوز بەتىنشە ۇستاماۋعا كەڭەس بەرەدى.

- ەگەر 112 قىزمەتىنە تۇرعىن ۇيلەرگە نەمەسە شارۋاشىلىق قۇرىلىستارىنا جىلاندار كىرىپ كەتكەنى تۋرالى، ءارى بۇل ادامداردىڭ ومىرىنە قاۋىپ توندىرەتىنى جونىندە حابارلاما كەلىپ تۇسسە، قۇتقارۋشىلار بىردەن كومەككە شىعادى. ولار جىلانداردى ۇستاپ، قاۋىپسىز جەرگە شىعارادى. ءبىز ءۇشىن بارلىق جىلاندار ۋلى بولىپ ەسەپتەلەدى. ولاردىڭ ادام ومىرىنە قانشالىقتى قاۋىپتى ەكەنىن ءتيىستى ماماندار انىقتاۋى ءتيىس. ايتا كەتۋ كەرەك، جىلانداردىڭ تارالۋىنىڭ الدىن الۋ قۇتقارۋشىلاردىڭ جاۋاپكەرشىلىگىنە كىرمەيدى، - دەلىنگەن ۆەدومستۆو اقپاراتىندا.

ال، تابيعات قورعاۋشى، «سىرداريا-تۇركىستان» مەملەكەتتىك وڭىرلىك تابيعي پاركىنىڭ عىلىمي قىزمەتكەرى عاني نازاربەك مامىر ايىندا جىلدانداردىڭ بەلسەندىلىگى ارتاتىنىن جەتكىزدى.

- شىمكەنت اۋماعى جىلدان جىلعا ۇلعايىپ جاتىر. بۇرىنعى ەگىستىك القابى بولعان دالالىق جەرلەرگە قازىر تۇرعىن ۇيلەر سالىندى. جاڭا مولتەكاۋداندار بوي كوتەرىپ جاتىر. بالكىم، بۇرىن وندا جىلانداردىڭ ۇياسى بولعان شىعار. سونداي-اق، قازىر جىلانداردىڭ بەلسەندىلىگى ارتاتىن كەزەڭ. كۇندىز ارى- بەرى جىلجىپ، قورەكتەنەدى. سوندىقتان بۇل قالىپتى جاعداي دەپ قابىلداۋ قاجەت، - دەيدى عاني نازاربەك.

ايتا كەتەيىك، بۇدان بۇرىن الماتىدا ءۇي جانۋارلارىن قاراۋسىز قالدىرۋعا تىيىم سالىناتىنىن جازعان بولاتىنبىز.