شىمكەنتتە جۇرگىزۋشى كۋالىگىن زاڭسىز بەرۋمەن اينالىسقان توپ ۇستالدى
شىمكەنت. KAZINFORM - قارجىلىق مونيتورينگ اگەنتتىگىنىڭ شىمكەنت قالاسى بويىنشا دەپارتامەنتى پروكۋراتۋرانىڭ ۇيلەستىرۋىمەن جۇرگىزۋشى كۋالىكتەرىن جۇيەلى تۇردە زاڭسىز بەرۋمەن اينالىسقان ۇيىمداسقان قىلمىستىق توپتىڭ ارەكەتىن توقتاتتى.
تەرگەۋ بارىسىندا 2023-2024 -جىلدارى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ 2-مامانداندىرىلعان حالىققا قىزمەت كورسەتۋ ورتالىعىنىڭ باسشىلىعى ج. مۋراشيموۆ پەن بىرگە ءبىرقاتار لاۋازىمدى تۇلعالار جۇرگىزۋشى كۋالىكتەرىن الۋ ءراسىمىن تەوريالىق جانە پراكتيكالىق ەمتيحانداردان وتپەي زاڭسىز الۋ سحەماسىن ۇيىمداستىرعانى انىقتالدى.
- اتالعان «قىزمەت» ءۇشىن ازاماتتاردان 150 مىڭنان 400 مىڭ تەڭگەگە دەيىن اقشا الىنعان. ناتيجەسىندە 500 دەن استام ادام زاڭسىز جولمەن جۇرگىزۋشى كۋالىگىن العان.
قازىرگى تاڭدا تەرگەۋ اياسىندا 200 ميلليون تەڭگەدەن استام سوماعا باعالانعان كۇدىكتىلەردىڭ مۇلكىنە - 2 جەكە ءۇي، 2 پاتەر، 2 جەر تەلىمى جانە 10 اۆتوكولىككە تاركىلەۋ ماقساتىندا تىيىم سالىندى.
سوتتىڭ سانكسياسىمەن 12 كۇدىكتىگە قاتىستى قاماۋعا الۋ تۇرىندەگى بۇلتارتپاۋ شاراسى قولدانىلدى، - دەپ جازدى قارجىلىق مونيتورينگ اگەنتتىگىنەن.
قىلمىستىق ءىس بويىنشا سوتقا دەيىنگى تەرگەۋ جالعاسۋدا.
ق ر قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريالاۋعا جاتپايدى.
ايتا كەتۋ كەرەك، جۇرگىزۋشى كۋالىكتەرىن بەلگىلەنگەن ءتارتىپتى اينالىپ ءوتىپ الۋ - قوعامدىق قاۋىپسىزدىككە تىكەلەي قاتەر توندىرەدى.
بۇل شىمكەنت قالاسىندا سوڭعى جىلدارى جيىلەگەن جول-كولىك وقيعالارىنان دا بايقالادى. 2022 -جىلى مۇنداي وقيعالار سانى 398 بولسا، 2024 -جىلى 878 گە جەتكەن.
بۇعان دەيىن شىمكەنتتە قوعامدىق كولىكتەر «تولەم» جۇيەسىنەن اجىراتىلاتىنى حابارلاندى.
