شىمكەنتتە دارىگەرلەر ىشەگى بىرنەشە جەردەن تەسىلگەن ازاماتتى امان الىپ قالدى
شىمكەنت. KAZINFORM - ناۋقاس اۋرۋحاناعا اۋىر حالدە جەتكىزىلگەن. تەكسەرۋ بارىسىندا ونىڭ اس ىشەگى 3-4 جەردەن تەسىلىپ، ءىش قۋىسىنا ينفەكسيا تاراعانى انىقتالدى.
وسىلايشا شىمكەنت قالالىق №1-كلينيكالىق اۋرۋحانانىڭ دارىگەرلەرى 38 جاستاعى ازاماتتى اجالدان اراشالاپ قالدى.
دارىگەرلەردىڭ ايتۋىنشا، اسقازاننان وتكەن ۇزىندىعى شامامەن 3 سانتيمەتر بولاتىن وتكىر سۇيەك ىشەكتى تەسىپ، پەرفوراتسياعا اكەلگەن. سونىڭ سالدارىنان پەريتونيت - ءىش پەردەسىنىڭ جەدەل قابىنۋى باستالعان. ناۋقاستا تاماق وتىمسىزدىگى دە بايقالعان.
- ناۋقاسقا شۇعىل تۇردە حيرۋرگيالىق وتا جاسالدى. مىندەتتى الەۋمەتتىك مەديتسينالىق ساقتاندىرۋ اياسىندا وتكەن وتا بارىسىندا حيرۋرگتەر ىشەكتى تەسىپ تۇرعان سۇيەكتى الىپ، زاقىمدالعان ىشەك بولىكتەرىن تىگىپ، قالپىنا كەلتىردى. سونداي-اق ءىش قۋىسى تولىق تازارتىلىپ، پەريتونيتتىڭ زارداپتارى جويىلدى. وتا 1,5 ساعاتقا سوزىلىپ، جالپى جانسىزداندىرۋمەن ءوتتى. قازىرگى تاڭدا ناۋقاستىڭ جاعدايى تۇراقتى، - دەپ حابارلادى الەۋمەتتىك مەديتسينالىق ساقتاندىرۋ قورىنىڭ شىمكەنت قالاسى بويىنشا فيليالى.
وتا جاساعان حيرۋرگ-دارىگەر نۇرعالي تۇرلىبايەۆتىڭ ايتۋىنشا، دەر كەزىندە كورسەتىلگەن مەديتسينالىق كومەكتىڭ ارقاسىندا اۋىر اسقىنۋلاردىڭ الدىن الۋ مۇمكىن بولعان.
ال ناۋقاستىڭ ءوزى دارىگەرلەرگە كاسىبي شەبەرلىگى مەن مەديتسينالىق كومەگى ءۇشىن العىسىن ءبىلدىردى.
ايتا كەتەيىك، بۇدان بۇرىن شىمكەنتتە دارىگەرلەر 4 جاسار بالانىڭ ىشىندەگى ۇلكەن ىسىكتى كۇردەلى وتانىڭ كومەگىمەن الىپ تاستاعانىن جازعان ەدىك.
