شىمكەنتتە بالاباقشا ەسەپشىسى - كوپبالالى ايەل بيۋدجەت قارجىسىن جىمقىرعانى ءۇشىن سوتتالدى

استانا. KAZINFORM - شىمكەنتتە مەملەكەت قاراجاتىن جىمقىرعانى ءۇشىن كوپبالالى انا سوتتالدى. ول بالاباقشا ەسەپشىسى قىزمەتىن اتقارىپ ءجۇرىپ، كوممۋنالدىق تولەمدەرگە ارتىق اقشا ءبولىپ وتىرعان. بۇل تۋرالى جەرگىلىكتى Otyrar.kz سايتى جازدى.

وسىلايشا بەس بالانىڭ اناسى ءوز شوتىنا 15 ميلليون تەڭگەدەن استام قارجىنى اۋدارىپ، مەملەكەتكە اسا ءىرى مولشەردە زالال كەلتىرىلگەن. ونىڭ كىناسى سوتتا دالەلدەنىپ، 2 جىلعا باس بوستاندىعىنان ايىرىلدى.

«سوتتالۋشىعا ق ك-نىڭ 189-بابى 4-بولىگىنىڭ 2-تارماعى، مەملەكەتتىك فۋنكتسيالاردى ورىنداۋعا ۋاكىلەتتىك بەرىلگەن ادامعا تەڭەستىرىلگەن ادام بولا تۇرا، ءوزىنىڭ قىزمەت بابىن پايدالانۋمەن ۇشتاستىرا وتىرىپ وزىنە سەنىپ تاپسىرىلعان بوتەننىڭ مۇلكىن اسا ءىرى مولشەردە يەلەنىپ الۋ بابى بويىنشا ايىپ تاعىلعان. سوتتالۋشىنىڭ تاعىلعان ايىپ بويىنشا كىناسى ءىس بويىنشا جيناقتالعان قۇجاتتارمەن دالەلدەنەدى»، - دەپ جازدى شىمكەنت قالالىق سوتىنىڭ باسپا ءسوز قىزمەتى.

ۇكىم زاڭدى كۇشىنە ەنگەن جوق.