شىمكەنتتە اليمەنت تولەمەگەن بورىشكەر سوتتالدى
شىمكەنت. KAZINFORM - شىمكەنت قالاسىنىڭ تۇران اۋدانى پروكۋراتۋراسىنىڭ ۇيلەستىرۋىمەن كامەلەتكە تولماعان بالالارىن اسىراۋعا اليمەنت تولەۋدەن قاساقانا جالتارعان بورىشكەر قىلمىستىق جاۋاپتىلىققا تارتىلدى.
اتاپ ايتقاندا، بورىشكەر مۇمكىندىگى بولا تۇرا ءوز مىندەتتەرىن ورىنداماي ۇزاق ۋاقىت بويى 1171723 تەڭگە بەرەشەكتى وتەمەگەن.
- بۇعان دەيىن ول قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 669-بابىنىڭ 1-بولىگى بويىنشا اكىمشىلىك جاۋاپتىلىققا، سونداي-اق 2022 -جىلعى 11-شىلدەدە ۇقساس قۇقىق بۇزۋشىلىعى ءۇشىن قازاقستان رەسپۋبليكاسى قىلمىستىق كودەكسىنىڭ 139-بابى بويىنشا قىلمىستىق جاۋاپتىلىققا تارتىلعان. وسىعان بايلانىستى سوتتىڭ 2025 -جىلعى 16-مامىرداعى ۇكىمىمەن قازاقستان رەسپۋبليكاسى قىلمىستىق كودەكسىنىڭ 139-بابى بويىنشا كىنالى دەپ تانىلىپ، 6 اي مەرزىمگە باس بوستاندىعىنان ايىرۋ جازاسى تاعايىندالعان، - دەلىنگەن شىمكەنت قالالىق پروكۋراتۋراسى حابارلاماسىندا.
سوت ۇكىمى زاڭدى كۇشىنە ەنگەن جوق.
پروكۋراتۋرا اليمەنت جونىندەگى مىندەتتەرىن ءۇش ايدان استام ۋاقىت ورىنداماعانى ءۇشىن ەكى جىلعا دەيىنگى مەرزىمگە باس بوستاندىعىن شەكتەۋگە نەمەسە سول مەرزىمگە باس بوستاندىعىنان ايىرۋ جانە 600 ساعاتقا دەيىنگى قوعامدىق جۇمىستارعا تارتۋ تۇرىندەگى جاۋاپتىلىققا تارتىلاتىنىن ەسكەرتتى.
ايتا كەتەيىك، جىل باسىنان بەرى ەلىمىزدە اليمەنت تولەمەگەنى ءۇشىن 126 قىلمىستىق جاۋاپكەرشىلىككە تارتىلدى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ادىلەت مينيسترلىگى مىندەتتى اتقارۋ كوميتەتىنىڭ ءتوراعاسى ماحسات بالابەكوۆ ايتتى.
