شىمكەنتتە 500 ادام جۇرگىزۋشى كۋالىگىن زاڭسىز العان
استانا. KAZINFORM - شىمكەنتتە جۇرگىزۋشى كۋالىكتەرىن زاڭسىز بەرۋ سحەماسى اشكەرەلەندى، دەپ حابارلايدى قالالىق پروكۋراتۋرانىڭ باسپا ءسوز قىزمەتى.
قالا پروكۋراتۋراسىنىڭ ۇيلەستىرۋىمەن شىمكەنت قالاسى بويىنشا قارجى مونيتورينگى اگەنتتىگىنىڭ دەپارتامەنتى جۇرگىزۋشى كۋالىكتەرىن زاڭسىز راسىمدەۋمەن اينالىسقان ۇيىمداسقان قىلمىستىق توپتىڭ جولىن كەستى.
2023- 2024 -جىلدارى «ازاماتتارعا ارنالعان ۇكىمەت» ك ە ا ق- نىڭ № 2 مامانداندىرىلعان ح ق ك و باسشىلىعى مەن قىزمەتكەرلەرى تەوريالىق جانە پراكتيكالىق ەمتيحاندارسىز جۇرگىزۋشى كۋالىكتەرىن راسىمدەۋگە جاعداي جاساعان.
- مۇنداي «قىزمەتتىڭ» قۇنى 150 مىڭنان 400 مىڭ تەڭگەگە دەيىن جەتكەن. ناتيجەسىندە كەمىندە 500 ادام جۇرگىزۋشى كۋالىگىن زاڭسىز العان. قىلمىستىق توپتىڭ تابىسى 150 ميلليون تەڭگەدەن اسقان. تەرگەۋ بارىسىندا كۇدىكتىلەردىڭ 200 ميلليون تەڭگەدەن استام مۇلكىنە تىيىم سالىندى. ءىس بويىنشا 15 تۇلعا ايىپتالۋشى دەپ تانىلعان. تەرگەۋ اياقتالىپ، ماتەريالدار سوتقا جولداندى، - دەلىنگەن شىمكەنت قالاسى پروكۋراتۋراسى تاراتقان حابارلامادا.
بۇعان دەيىن ەلوردا سوتى اقپاراتتىق جۇيەگە جالعان مالىمەتتەر ەنگىزىپ، اۋقىمدى قارجىلاي زالال كەلتىرگەن حالىققا قىزمەت كورسەتۋ ورتالىعىنىڭ بۇرىنعى قىزمەتكەرىنە ۇكىم شىعاردى.
