شىمكەنتتە 100 جاستاعى ۇستاز ساباق بەرەدى
استانا. قازاقپارات - شىمكەنتتە 100 جاستاعى اجە ءالى كۇنگە دەيىن ساباق بەرەدى، دەپ حابارلايدى 24KZ.
ۆالەنتينا يۆانوۆنا بۇكىل سانالى عۇمىرىندا نەمىس ءتىلى ءپانىن وقىتقان.
جاسىنىڭ ۇلعايعانىنا قاراماستان قازىر دە شاكىرت تاربيەلەۋدى جالعاستىرىپ كەلەدى. ۇيدە نەمەرەلەرىنە شەت ءتىلىن ۇيرەنۋگە كومەكتەسەدى. اۋدارما ءىسى، وقۋ، جاتتىعۋ جاساۋمەن دە اينالىسادى.
عاسىر جاساعان ارداقتى انا ۇزاق ءومىر ءسۇرۋدىڭ قۇپياسىمەن ءبولىستى. ۆالەنتينا يۆانوۆنا ءۇشىن مىنا ەسكى فوتوالبومدا قۇندى ەستەلىكتەر ساقتالعان. ول ءمۇنداعى فوتولارداعى ءار جىلدارى ساباق بەرگەن شاكىرتتەرىنىڭ ءبارىن تانىپ، ءتۇسىن تۇستەپ وتىر. ءتىپتى قاي بالانىڭ بۇزىق، قايسىسىنىڭ جاقسى وقىعانىنا دەيىن بىلەدى. قازىر بۇل سۋرەتتەگى وقۋشىلاردىڭ ءوزى نەمەرە ءسۇيىپ، اپا- اتاعا اينالعان.
ۆالەنتينا روزۋم، شىمكەنت قالاسىنىڭ تۇرعىنى:
- بۇل وتە جاقسى سىنىپ بولاتىن. شاكىرتتەرىمنىڭ بارلىعى ءارتۇرلى سالادا ەڭبەك ەتەدى. مەن جۇمىس ىستەگەن گيمنازيادا قىزمەت ىستەيتىن مۇعالىمدەردىڭ تەڭ جارتىسى - مەنىڭ وقۋشىلارىم. الدى زەينەتكە شىعىپ كەتتى.
ۆالەنتينا يۆانوۆنا جاي عانا ۇستاز ەمەس، ول شىمكەنتتىكتەر ءۇشىن ءتىرى اڭىز دەسە دە بولادى. بىلىكتى ۇستاز 80 جاسقا دەيىن مەكتەپتە جۇمىس ىستەپ، اعىلشىن جانە نەمىس تىلدەرىنەن ساباق بەردى. قازىر 100 گە كەلگەن زەينەتكەر نەمەرە-شوبەرەلەرىنە باعىت بەرىپ، بىلگەنىن ۇيرەتىپ وتىر. 100 جاستاعى ۇستاز اينالاسىن تەك بىلىمىمەن ەمەس، سونىمەن قاتار ءوزىن ۇنەمى دامىتىپ وتىرۋ ۇلگىسىمەن دە شابىتتاندىرادى. كىتاپ وقىپ، اۋدارما جاسايدى. ءتىپتى گيمناستيكامەن اينالىسۋعا ۋاقىت تابادى.
«جاستىڭ ۇلعايۋى ادەمى قارتايۋعا كەدەرگى ەمەس»، - دەيدى قارت ۇستاز. ونىڭ سالاۋاتتى ءومىر سالتىن ۇستانۋى مەن ءومىر سۇرۋدەگى بەلسەندىلىگى اينالاسىنداعىلاردى جىگەرلەندىرىپ، كۇش- قۋات سىيلايدى.
ۆالەنتينا يۆانوۆنا جاقىندا 100 جىلدىق مەرەيتويىن وتباسىمەن بىرگە جانە سۇيىكتى شاكىرتتەرىنىڭ ورتاسىندا اتاپ ءوتتى. قارت اجە ءوزىنىڭ ءبىر عاسىر بۇرىن بەرىلگەن تۋۋ تۋرالى كۋالىگىن كورسەتىپ، «مۋزەي جادىگەرى» دەپ ازىلدەگەندى جاقسى كورەدى. ال ۇزاق جاساۋىنىڭ سىرىن دەنساۋلىعىن كۇتىپ، سالاۋاتتى ءومىر سالتىن ۇستانۋىمەن بايلانىستىرادى. ادام ءوزىن كۇتكەندە عانا كارىلىكتىڭ راقاتىن كورەتىنىن ايتادى.
