شىمكەنت زووباعىندا تۇيەقۇستى تەپكەن ەر ادام ىزدەستىرىلىپ جاتىر
شىمكەنت. KAZINFORM- وقيعانى وزگە كەلۋشىلەر بەينەجازباعا ءتۇسىرىپ، الەۋمەتتىك جەلىگە جۇكتەگەن.
شىمكەنت قالالىق زووباعىندا ەر ادام قاۋىپسىزدىك تالاپتارىن ەلەمەي، قورشاۋدان اسىپ تۇسكەن. ول تۇيەقۇستى تەۋىپ قانا قويماي، باسقا دا جانۋارلاردى ادەيى قورقىتا باستاعان. بۇل ارەكەت زووباق قىزمەتكەرلەرىنىڭ دە، قالا تۇرعىندارىنىڭ دا اشۋ-ىزاسىن تۋعىزدى.
- جانۋارلار - ويىنشىق ەمەس، ولار دا اۋىرسىنۋ مەن قورقىنىشتى سەزىنە الادى. مۇنداي ارەكەت ادامگەرشىلىككە جات. جانۋارلارعا قۇرمەتپەن قاراۋ - ءاربىر ازاماتتىڭ بورىشى، - دەدى زووباق وكىلدەرى.
زووباق اكىمشىلىگى قۇقىق بۇزۋشىنى انىقتاۋعا قوعام بەلسەندىلەرىنەن كومەك سۇراپ وتىر.
- ەگەر بۇل ازاماتتى تانىساڭىز، بىزگە حابارلاسىڭىز. اقپارات مىندەتتى تۇردە قۇقىق قورعاۋ ورگاندارىنا جولدانادى، - دەلىنگەن رەسمي حابارلامادا.
شىمكەنت قالالىق پوليتسيا دەپارتامەنتى بۇل دەرەككە بايلانىستى تەكسەرۋ جۇمىستارى باستالعانىن راستادى. قازىرگى تاڭدا قۇقىق بۇزۋشىنى انىقتاپ، ونى زاڭ اياسىندا جاۋاپقا تارتۋ ماسەلەسى قارالىپ جاتىر.
