شىمكەنت قالاسى اكىمىنىڭ ورىنباسارىنا شابۋىل جاساۋعا نە سەبەپ بولدى - پوليتسيانىڭ جاۋابى

استانا. KAZINFORM - شىمكەنت قالاسى اكىمىنىڭ ورىنباسارى رۋسلان بەردەنوۆكە جاسالعان قارۋلى شابۋىلعا قاتىستى تەرگەۋ امالدارى جالعاسىپ وتىر.

وقيعادان كەيىن الەۋمەتتىك جەلىلەردە قىلمىستىڭ جەكە سەبەپتەرى تۋرالى راستالماعان نۇسقالار تاراي باستادى، ونىڭ ىشىندە كۇدىكتىنىڭ ايەلىنە قىسىم كورسەتۋ دە بولدى. الايدا شىمكەنت قالالىق پوليتسيا دەپارتامەنتىندە بۇل قاۋەسەتتى جوققا شىعاردى.

- ب ا ق پەن الەۋمەتتىك جەلىلەردە اكىمنىڭ ورىنباسارى رۋسلان بەردەنوۆكە جاسالعان شابۋىلعا شابۋىلشىنىڭ ايەلىنە جاسالعان قىسىم سەبەپ بولدى دەگەن جالعان اقپارات تاراپ جاتىر. بۇل اقپارات شىندىققا سايكەس كەلمەيتىنىن مالىمدەيمىز، - دەپ حابارلادى شىمكەنت قالالىق پوليتسيا دەپارتامەنتى.

بۇل جاعدايعا قالالىق ىشكى ساياسات جانە جاستار ءىسى ءبولىمىنىڭ باسشىسى ايگەرىم جۇماعۇلوۆا دا تۇسىنىك بەردى. ول كۇدىكتىنىڭ ايەلى بەردەنوۆپەن تانىس ەمەس ەكەنىن اتاپ ءوتتى.

- پوليتسيا بولىمىندە ۇستالعان ادامنىڭ ايەلىمەن سويلەستىم. ايعاق بەرۋگە كەلگەن ايەل بەردەنوۆتى تانىمايتىنىن ايتتى. ونداي جاعدايدا قانداي قىسىم كورسەتۋ تۋرالى ايتۋعا بولادى؟ تەرگەۋ قورىتىندىسى شىققانشا، سوت ۇكىم شىعارعانشا سىزگە ءۇزىلدى-كەسىلدى ايىپ تاعۋعا كىم قۇقىق بەردى؟! سەكسۋالدىق قىسىم كورسەتۋ نۇسقاسىن ايتىپ قانا قويماي، كۇدىكتىنى اقتايتىن (سوت شەشىمى شىققانعا دەيىن ول وسى مارتەبەدە قالادى)، تەرگەۋسىز سوتتى اقتايتىن ادامداردى تۇسىنبەيمىن»، - دەدى جۇماعۇلوۆا.

ول ب ا ق وكىلدەرىن، بلوگەرلەر مەن قۇقىق قورعاۋشىلاردى زاڭدى بۇزباۋعا جانە جالعان اقپارات جاريالاماۋعا شاقىردى.

- ب ا ق، بلوگەرلەر، قۇقىق قورعاۋشىلار - قازاقستان رەسپۋبليكاسىنىڭ زاڭدارىن ەستە ساقتاڭىزدار. كۇدىكتىنىڭ، ونىڭ جۇبايىنىڭ جەكە دەرەكتەرىنىڭ، ولاردىڭ الەۋمەتتىك جەلىدەگى پاراقشالارى مەن فوتوسۋرەتتەرىنىڭ جاريالانۋى، تەكسەرىلمەگەن مالىمەتتەردىڭ فاكت رەتىندە كورسەتىلۋى - مۇنىڭ بارىنە ەڭ الدىمەن مەديا زاڭگەرلەر باعا بەرەدى دەپ ويلايمىن. مەن سونداي-اق ەكى وتباسىنىڭ بالالارىن ويلاۋعا شاقىرامىن. جەكە دەرەكتەردى جاريالاۋ ارقىلى ءسىز ولاردىڭ بولاشاعىنا قاۋىپ توندىرەسىز. اقپاراتتى تەكسەرمەي، بىرەۋدى سەكسۋالدى قىسىم كورسەتتى دەپ ايىپتاماس بۇرىن ەكى جانۇياعا كەلتىرگەن ازاپ تۋرالى ءبىر ءسات ويلانىڭىز. مۇمكىن توقتايتىن كەز كەلدى، - دەپ جازدى ول.

ەسكە سالا كەتسەك، شىمكەنتتە قالا اكىمىنىڭ ورىنباسارى رۋسلان بەردەنوۆكە قاستاندىق جاسالعانى تۋرالى جازعان بولاتىنبىز.

جۋرناليست، بەلگىلى كاسىپكەر بەيبىت الىبەكوۆ بولعان جاعدايدى قالاداعى قۇرىلىس سالاسىندا ءتارتىپ ورناتۋمەن بايلانىستى بولۋى مۇمكىن ەكەنىن اتاپ ءوتتى.

اۆتور

زارينا تۋعانبايەۆا