شىلدەدەن باستاپ سۇيىتىلعان گاز باعاسىن كوتەرۋ جوسپارلانىپ وتىر
استانا. KAZINFORM - ەنەرگەتيكا مينيسترلىگى اشىق ن ق ا پورتالىندا بۇيرىق جوباسىن جاريالادى. وعان سايكەس 1-شىلدەدەن باستاپ قازاقستاندا سۇيىتىلعان مۇناي گازىنىڭ باعاسى ءبىرشاما وزگەرۋى مۇمكىن.

بۇل شارانى قابىلداۋ قاجەتتىگى ءبىرقاتار سەبەپتەرگە بايلانىستى.
بىرىنشىدەن. بۇگىنگى تاڭدا سۇيىتىلعان مۇناي گازىنىڭ باعاسى ونى ءوندىرۋدىڭ وزىندىك قۇنىنان الدەقايدا تومەن. وسىلايشا سمگ ءوندىرىسىنىڭ وزىندىك قۇنى تونناسىنا 60 مىڭنان 70 مىڭ تەڭگەگە دەيىن وزگەرەدى. ال وڭدەۋشى زاۋىتتار ءۇشىن قولدانىستاعى شەكتى كوتەرمە باعا تونناسىنا 40320 تەڭگەنى قۇرايدى. وسىلايشا وندىرىلگەن ءاربىر توننا گازدان زاۋىتتار 20-30 مىڭ تەڭگە كولەمىندە شىعىنعا ۇشىرايدى.
ەكىنشىدەن. جىلدان جىلعا سۇيىتىلعان مۇناي گاز تۇتىنۋدىڭ كۇرت ءوسۋى بايقالادى. وتكەن جىلدىڭ وزىندە قازاقستاندا تۇتىنۋ 2022 -جىلمەن سالىستىرعاندا 400 مىڭ تونناعا نەمەسە %28 عا ءوستى. ماسەلەن، 2023 -جىلى سمگ تۇتىنۋ كولەمى 2,2 ميلليون توننانى قۇرادى (2022 -جىلى 1,8 ميلليون توننا) .
تومەن باعالارعا بايلانىستى سۇيىتىلعان مۇناي گاز ءوندىرىسىنىڭ تۇتىنۋى مەن رەنتابەلدىلىگىنىڭ ارتۋى وتىننىڭ وسى ءتۇرىن ءوندىرۋدىڭ تومەندەۋىنە جانە وڭىرلەردە بەلگىلى ءبىر تاپشىلىققا اكەلدى. قازىرگى تاڭدا تاپشىلىق دەڭگەيى شامامەن %20-25 عا جەتەدى.
ۇشىنشىدەن. سۇيىتىلعان مۇناي گاز باعانى ودان ءارى تەجەگەن جاعدايدا قازاقستاندىق ءوندىرۋشى زاۋىتتاردا ىشكى نارىقتاعى سۇرانىستى قاناعاتتاندىرۋ ءۇشىن ءوندىرىس كولەمىن ۇلعايتۋ مۇمكىندىگى بولمايدى. زالال سالدارىنان زاۋىتتار تيىمدىرەك ونىمگە اۋىسا وتىرىپ، سمگ وندىرىسىنە قىزىعۋشىلىعىن جوعالتۋدا. وسىنداي سەبەپتەرگە بايلانىستى ينۆەستورلار دا سالاعا ينۆەستيتسيا سالعىسى كەلمەيدى.
تورتىنشىدەن. قازاقستانداعى سۇيىتىلعان مۇناي گاز ەڭ تومەن باعالاردىڭ ءبىرى ايماققا بايلانىستى - 54 تەن 86 تەڭگەگە دەيىن. سالىستىرۋ ءۇشىن رەسەيدە ءبىر ليتر گازدىڭ باعاسى 132 تەڭگە، ازەربايجاندا - 171 تەڭگە، تاجىكستاندا - 273 تەڭگە.
ساراپشىلاردىڭ بولجامىنشا، 2024 -جىلى ىشكى نارىقتا تۇتىنۋ كولەمى تاعى 200 مىڭ تونناعا ارتىپ، 2,4 ميلليون توننانى قۇرايدى. بۇل جاعدايدا گاز تاپشىلىعى %30-40 دى قۇراۋى مۇمكىن.
«سونىمەن قاتار ءوندىرۋشى زاۋىتتار سۇيىتىلعان گاز ءوندىرىسىنىڭ دەڭگەيىن ۇستاپ تۇرۋ ماقساتىندا باعانى تۇزەتۋ تۋرالى ماسەلەلەر مەن وتىنىشتەردى بىرنەشە رەت كوتەردى. وسىلايشا اتالعان تاۋەكەلدەردى بولدىرماۋ ماقساتىندا 1-شىلدەدەن باستاپ سۇيىتىلعان مۇناي گازىنىڭ باعاسىن تۇزەتۋ جوسپارلانعان. ماسەلەن، سۇيىتىلعان مۇناي گازىنىڭ ءبىر تونناسى ءۇشىن شەكتى كوتەرمە باعا - 45158 تەڭگە (بۇرىن — 40320 تەڭگە). بۇل رەتتە شەكتى بولشەك ساۋدا باعاسى وڭىرگە بايلانىستى ليترىنە 5 تەن 8 تەڭگەگە دەيىن ازداپ وسەدى» دەپ حابارلادى ەنەرگەتيكا مينيسترلىگىنەن.
بۇيرىق جوباسى قوعامدىق تالقىلاۋ ساتىسىندا.