شىڭجاڭعا باراتىن قازاقستاندىقتار كوبەيدى
استانا. KAZINFORM - اسىرەسە شىڭجاڭ ۇيعىر اۆتونوميالىق ولكەسىنە باراتىن ساياحاتشىلار كوبەيدى. ءبىر عانا قورعاس بەكەتىنەن وتەتىن جولاۋشىلار سانى قازىردىڭ وزىندە تاۋلىگىنە 34 مىڭنان اسىپ وتىر.
قىتايلىقتاردىڭ دەنى قازاقستاندىق ساپالى ونىمدەردى الۋعا قۇمار. ۆيزاسىز رەجيم شەكارا ماڭىنداعى تۋريزمگە جاڭا دەم بەردى. تالاپ وزگەرگەلى ەكى جاقتان دا ساياحاتتاۋشىلار سانى كۇرت وسكەن. ساۋدا-ساتتىق كولەمى ارتتى.
قورعاس شەكارالىق ىنتىماقتاستىق ورتالىعىندا 40-تان استام ەلدىڭ مىڭعا تارتا تاۋار ءتۇرى ساۋدالانادى. وندا قىتايلىق تاراپتان باسقارىلاتىن 2000 دۇكەن بار. ونىڭ 200- ءى باج سالىعىنسىز جۇمىس ىستەيدى. مۇندا ساۋدا جاساپ جۇرگەن قازاقستاندىقتار عانا ەمەس، قىتايلىقتار دا كوپ.
لينا نۋرۋاسي، سينيۋان ۋەزىنىڭ تۇرعىنى:
- مەن بۇل جەرگە كوپ مولشەردە شوكولاد ساتىپ الۋ ءۇشىن كەلدىم. قازاقستاننىڭ شوكولادتارى وتە ءدامدى، ءارى تازا. سىرتقى قاپتامالارى دا تارتىمدى. سىيلىق رەتىندە ۇيالماي بەرۋگە بولادى.
شان سينجۋي، شينحۋا ۋنيۆەرسيتەتىنىڭ ستۋدەنتى:
- ۇستازداردان قۇرالعان ەرىكتىلەر توبىمەن بىرگە العاش رەت كەلۋىم. ەكى ەل اراسىنداعى بارىس- كەلىس ءدال وسى جەردە قىزىپ تۇر. مۇندا قازاقستاننىڭ داستۇرىمەن تانىسىپ قانا قويماي، الەمنىڭ كوپتەگەن ەلىنەن كەلەتىن تاۋاردى باجسىز ساتىپ الۋعا بولادى. وتە ىڭعايلى.
قورعاس بەكەتى ارقىلى وتكەن ادام سانى كەيىنگى 7 ايدا 4 ميلليونعا جەتتى. بۇل وتكەن جىلدىڭ وسى كەزەڭىمەن سالىستىرعاندا 81 پايىزعا كوپ. قىتايدىڭ قورعاس شەكارا قىزمەتىنىڭ مالىمەتىنە ساي، بۇگىندە قازاق- قىتاي شەكاراسى ارقىلى تاۋلىگىنە 34 مىڭ ادام كىرىپ-شىعادى.
يان كان، قورعاس شەكارالىق باقىلاۋ بەكەتى كەزەكشى توبىنىڭ جەتەكشىسى:
- اسىرەسە تاڭعى ۋاقىتتا قاربالاس بولادى. ۇزىن-سونار كەزەك قالىپتاسپاس ءۇشىن جەدەل تەكسەرىپ وتكىزۋ قىزمەتى تارتىلادى. ەگەردە اۋقىمدى ءىس-شارالار مەن كەشەندى كورمەلەر وتەتىن بولسا، الدىن الا جازىلۋ جۇيەسىن ىسكە قوسامىز. بۇل قاۋىپسىزدىك پەن جولاۋشىلاردىڭ كەدەندىك راسىمدەۋدەن كەدەرگىسىز وتۋنە مۇمكىندىك بەرەدى. قازىر قىتاي تاراپى كەدەندىك راسىمدەۋ تيىمدىلىگىن جەتىلدىرىپ جاتىر. قوسىمشا 22 تەكسەرۋ، قاداعالاۋ ورنى ازىرلەندى. ولار جولاۋشىلار ەڭ كوپ وتەتىن ۋاقىتتا ىسكە قوسىلادى.
رۋسلان باقىتبەك ۇلى، 24.KZ
