«شىعىس» وڭىرلىك اسكەرىنىڭ بۇرىنعى قولباسشىسى ۇستالدى - انتيكور

استانا. KAZINFORM - انتيكور وتستاۆكاداعى گەنەرال-مايورعا قاتىستى قىلمىستىق ءىستى تەرگەپ جاتىر. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ ءمالىم ەتتى.

- سىبايلاس جەمقورلىققا قارسى ءىس-قيمىل اگەنتتىگى «شىعىس» وڭىرلىك قولباسشىلىعى اسكەرلەرىنىڭ بۇرىنعى قولباسشىسى، وتستاۆكاداعى گەنەرال-مايورعا قاتىستى قىلمىستىق ءىستى تەرگەپ جاتىر. ول ادال كاسىپكەردىڭ سەنىمىن تەرىس پايدالانىپ، جوعارى لاۋازىمدى اسكەري تۇلعا رەتىندەگى بەدەلىن قولدانىپ، اسا ءىرى كولەمدە قارجى يەمدەنگەن. قىلمىس قازاقستان اۋماعىندا الەۋمەتتىك جوبالارعا ينۆەستيتسيا سالۋدان جوعارى تابىس تابۋعا بولادى دەگەن سىلتاۋمەن، مينيسترلىكتەر مەن شەتەلدىك سەرىكتەستەردىڭ ىقپالدى وكىلدەرىنىڭ قولداۋىمەن جۇزەگە اسادى دەگەن جەلەۋمەن جاسالعان، - دەدى دانيار بيگايداروۆ ۆەدومستۆودا وتكەن باسپا ءسوز ءماسليحاتىندا.

رەسمي وكىلدىڭ مالىمدەۋىنشە، سوتتىڭ سانكسياسىمەن كۇدىكتى قاماۋعا الىندى.

- كۇدىكتىنىڭ باسقا دا قىلمىستىق قۇقىق بۇزۋشىلىقتارعا قاتىسى بار-جوعى تەكسەرىلىپ جاتىر. تەرگەۋ جالعاسىپ جاتىر، - دەپ تولىقتىردى انتيكور وكىلى.

بۇعان دەيىن حابارلاعانىمىزداي بۇرىنعى ادىلەت ءمينيسترى مارات بەكەتايەۆ 9 جىلعا سوتتالدى.