شىعىس قازاقستاندا شەكاراداعى اۋىل «قىتاي ينتەرنەتىن» پايدالانىپ وتىر
وسكەمەن. KAZINFORM - شىعىس قازاقستان وبلىسىندا شەكارا شەبىندە ورنالاسقان مارقاكول اۋدانى بىلعارى تابىتى اۋىلىندا 60 قا جۋىق ادام تۇرادى. ءبىراق ولار قازاقستان جەرىندە «قىتاي ينتەرنەتىن» پايدالانىپ وتىر.
«جىلدامدىعى وتە جاقسى»
بىلعارى تابىتى اۋىلىنا اياق باسساڭىز بىردەن ۇيالى تەلەفونىڭىزعا «قىتايعا قوش كەلدىڭىز!» دەگەن حابارلاما كەلەدى.
بۇل تۋرالى پارلامەنت ءماجىلىسىنىڭ دەپۋتاتى ەرلان سايىروۆ تا ايتقان ەدى. ءبىراق ءالى كۇنگە دەيىن ماسەلە شەشىلمەي كەلەدى.
- قازىر شەكارالىق اۋدانداردا ينتەرنەت جوق. قىتايدىڭ ۇيالى بايلانىسى عانا ىستەپ تۇر. مىنە وسىنى قالىپقا كەلتىرۋ كەرەك. ونداي اۋدانداردىڭ ءبارىن قازاقستاننىڭ اقپاراتتىق ايماعىنا قايتادان ەنگىزۋ كەرەك، - دەدى ول.
بىلعارى تابىتى اۋىلىنىڭ تۇرعىندارى «بيلايننىڭ» ارنايى تاريفىنە قوسىلىپ، سولاردىڭ ىشىنەن قىتايلىق وپەراتوردى تاڭدايتىنىن، سول ارقىلى ينتەرنەتتىڭ «قىزىعىن» كورىپ وتىرعانىن جەتكىزدى.
- ايتپەسە بىزدە ۇيالى بايلانىس تا، ينتەرنەت تە ۇستامايدى. «قىتاي ينتەرنەتى» جاقسى بولدى. الەۋمەتتىك جەلىگە كىرىپ، WhatsApp ارقىلى قالاداعى تۋعان- تۋىسپەن حابار الماسىپ وتىرمىز. جىلدامدىعى وتە جاقسى، - دەيدى اۋىل حالقى.
اكىمدىك نە دەيدى؟
وسى ماسەلەگە قاتىستى جەرگىلىكتى بيلىكتىڭ جاۋابىن ءبىلۋ ءۇشىن Kazinform ءتىلشىسى مارقاكول اۋدانىنىڭ اكىمى رۇستەمبەك كەمەشيەۆكە ساۋالحات جولدادى.
- بىلعارى تابىتى اۋىلىندا 56 ادام تۇرادى. سوڭعى ون جىلدا ەلدى مەكەننەن 50 ادام كوشىپ كەتكەن. اۋىلداعى ينتەرنەت ماسەلەسىنەن حاباردارمىز. داۋىستىق بايلانىس جانە موبيلدى ينتەرنەتپەن قامتاماسىز ەتۋ جۇمىسىن ليتسەنزيالىق مىندەتتەمە شەڭبەرىندە ىسكە اسىرۋ جوسپارلانىپ وتىر. مارقاكول اۋدانى بويىنشا بىلتىردان بەرى 13 اۋىلدى، ونىڭ ىشىندە 3 اۋىلدى - اقبۇلاق، اقجايلاۋ، قاينارلىنى ۇيالى بايلانىس وپەراتورلارىنىڭ قوسىمشا مىندەتتەمەلەرىنە قوسۋ ءۇشىن، تاعى 10 اۋىل - جاڭااۋىل، قازاقستان، بىلعارى تابىتى، تاقىر، شەڭگەلدى، قاراشىلىك، قاروي، جيدەلى، يگىلىكتى «ۆوستوكتەلەكوم» ج ش س ارقىلى ينتەرنەتكە قوسۋ جاي-جاپسارىن تالقىلاپ جاتىرمىز، - دەپ جاۋاپ بەردى اۋدان اكىمى.
2026 -جىلى ۇرۇنحايكا اۋىلىندا رەسپۋبليكالىق بيۋدجەت ەسەبىنەن تالشىقتى- وپتيكالىق بايلانىس جەلىلەرى («كارتەل» ج ش س بايلانىس وپەراتورى)، 285 ادام تۇراتىن ءتوسقايىڭ اۋىلىندا جەرگىلىكتى اتقارۋشى ورگان ەسەبىنەن انتەننا- ماچتالىق قۇرىلىم سالىنىپ، ىسكە قوسىلماق.
- 2027 -جىلى 5 ەلدى مەكەندى (تەرىسكەي- بوكەنباي - 62 ادام، بالىقتىبۇلاق - 45 ادام، بۇعى ءمۇيىز - 63 ادام، شاعاناتى - 71 ادام، كۇنگەي- بوكەنباي - 41 ادام تۇرادى) رەسپۋبليكالىق بيۋدجەت ەسەبىنەن ينتەرنەتپەن قامتاماسىز ەتۋ ءۇشىن تالشىقتى- وپتيكالىق بايلانىس جەلىلەرى جۇرگىزىلەدى، - دەيدى رۇستەمبەك كەمەشيەۆ.
وبلىس اكىمدىگىنىڭ مالىمەتىنشە، بيىل 60 اۋىلعا ينتەرنەت تارتىلماق.
وبلىس بويىنشا 2022 -جىلى 17 اۋىل، 2023 -جىلى 20 اۋىل، 2024 -جىلى 45 اۋىل ينتەرنەتپەن قامتاماسىز ەتىلگەن. بۇل باعىتتاعى جۇمىستار وسى جىلى دا جالعاسادى.
سول ءۇشىن جەرگىلىكتى اتقارۋشى ورگاندار مەن بايلانىس وپەراتورلارى اراسىندا كەلىسىمشارتتار جاسالىپ جاتىر.
- التاي اۋدانىنا قاراستى فەكليستوۆكا اۋىلىندا ينتەرنەت تارتىلدى. حالىقتىڭ ارىز- شاعىمدارىنان كەيىن اۋىلدى بايلانىسپەن قامتۋ ءۇشىن 3 جانە 4G ستاندارتىنا ساي بازالىق ستانسا ىسكە قوسىلدى. ونىڭ جىلدامدىعى 86,9 مبيت/س- قا دەيىن جەتەدى. بايلانىس وپەراتورى «كار تەل» ج ش س ءوز قاراجاتى ەسەبىنەن انتەننا- ماچتالىق قۇرىلىمدى ورناتىپ، ەلەكتر جەلىسىن تارتتى. سونداي- اق Tele2 جانە Kcell/Activ وپەراتورلارىنىڭ جەلىسىن ورتاق پايدالانۋ مۇمكىندىگى قاراستىرىلىپ جاتىر، - دەلىنگەن اقپاراتتا.
ەسكە سالساق، وسىعان دەيىن الەم ەلدەرىندە ۇيالى بايلانىس پەن ينتەرنەت قانشا تۇراتىنىن جازعانبىز.
تالعاتجان مۇحامەتبەك ۇلى
