شىعىس قازاقستان تۇرعىندارىن كەنە شاعا باستادى
وسكەمەن. KAZINFORM - شىعىس قازاقستان وبلىسىندا ەكى ادامدى كەنە شاقتى.
بيىل وڭىردە كەنەلەر ادەتتەگىدەن ەرتە شىقتى. دارىگەرلەرگە كەنەدەن زارداپ شەككەن 2 ادام جۇگىنگەن. ەكەۋىنە دە كەنە يممۋنوگلوبۋلينى ەگىلدى.
- قازىرگى تاڭدا وبلىستاعى مەديتسينالىق مەكەمەلەردە كەنە شاققان ادامدارعا شۇعىل پروفيلاكتيكالىق كومەك كورسەتۋ ءۇشىن يممۋنوگلوبۋلين قورى جەتكىلىكتى. كەنەنىڭ بەلسەندىلىگى اۋا رايى جاعدايىنا بايلانىستى. نەگىزىنەن كەنە ماۋسىمى ساۋىردەن قىركۇيەككە دەيىن سوزىلادى. ەڭ قاۋىپتى كەزەڭ - مامىر-ماۋسىم ايلارى، - دەيدى ش ق و سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ مىندەتىن اتقارۋشى ساۋلە سليامعازينا.
ايتا كەتەيىك، كەنەلەر تەك قانا كەنە ەنتسەفاليتىنىڭ عانا ەمەس، كەنە سۇزەگى، كەنە بوررەليوزى (لايما اۋرۋى) سياقتى باسقا دا ينفەكسيالارىنىڭ تاسىمالداۋشىسى.
اۆتور
تالعاتجان مۇحامەتبەك ۇلى
