شىڭ لۇڭ: مەن ۇيلەنگەن كەزدە ەكى ايەل وزىنە قول جۇمساعان

استانا. قازاقپارات - وسى كۇندەرى اكتەر كۇندەلىكتى ەكى ساعاتتىق جاتتىعۋ جاساۋعا مىندەتتى. ال ساقتاندىرۋ اگەنتتىكتەرى ءوز دەنەسىمەن نە جاسايتىنى بەلگىسىز دەپ، وعان كەپىلدىك بەرۋدەن باس تارتىپ وتىر. نازارلارىڭىزعا يزۆەستيا سايتىنىڭ ءتىلشىسى العان، دجەكي چاننىڭ (شىڭ لۇڭ - رەد.) سۇقباتىن ۇسىنامىز.

- ءسىز نە سەبەپتى گولليۆۋدتەن قىتايعا قايتىپ ورالدىڭىز؟

- ولار مەنىڭ تەك كومەديا جانرىنداعى بوەۆيكتەردى تۇسىرگەنىمدى قالايدى. جاقسى، مەن «جاڭا پوليسيا وقيعاسى» اتتى فيلمدى ءتۇسىردىم.

ءبىراق قاشانعى بۇلاي جۇرە بەرۋگە بولادى؟ سوندا كەلەسى جىلى «چاس پيك 3»، ارعى جىلى «چاس پيك 4»، ەكى جىلدان كەيىن «چاس پيك 5» فيلمدەرىن ءتۇسىرۋىم كەرەك پە؟ سوندىقتان قىتايعا ورالىپ، «اڭىز» اتتى تاريحي بلوكباستەر ءتۇسىردىم.

مۇنى گولليۆۋدتە جۇرگەنىمدە ەش تۇسىرە الماس ەدىم. ويتكەنى ولار فيلمدى بيزنەس كورەدى. كوپ اقشا سالادى جانە 200 پايىز بولىپ قايتقانىن قالايدى. ال ازيادا جۇرگەن كەزدە قالاعان ىسىممەن اينالىسا الامىن.

- ءسىزدىڭ بۇل جەردە جەكە كينو كومپانياڭىز بار ما؟

- ءيا، ءبىراق مەنىڭ جولىم بولعىش. فيلمدەرىمە كوپ قاراجات سالۋىم كەرەك. جاڭا جوبامدى ۇسىنا سالىسىمەن، بانكتەر قارجىلاي كومەك كورسەتۋگە دايىن تۇرادى. جۇگىرىپ كەلىپ: «سىزگە قانشا قاراجات كەرەك؟» دەپ سۇرايدى.

مەن بولسام: «راقىمەت، جەتكىلىكتى» دەيمىن. ولار بولسا: «جو-جوق، قاجەت بولسا، تاعى دا الىڭىز» دەپ ايتادى. مەنىڭ ەسىمىم كاسىپكەرلەرگە جاقسى اسەر بەرەتىندىكتەن، بۇل ىسكە كوپ ادامدى كىرىستىرۋگە تىرىسامىن. سەبەبى تەك ماعان ەمەس، ولارعا دا پايدا تۇسكەنىن قالايمىن.

مەن فيلمدەرگە پروديۋسەرلىك جاسايمىن، جاس رەجيسسەرلەرگە مەنىڭ ستۋديامدا جاڭا فيلم تۇسىرۋگە كومەكتەسەمىن. قىسقاسى، پروديۋسەرلىك جۇمىس ۇلكەن جاۋاپكەرشىلىكتى تالاپ ەتەدى. ءوز باسىم ادام اقشاسىنىڭ جەلگە ۇشقانىن قالامايمىن. ال گولليۆۋد نەسىمەن جاقسى؟ ول جاقتا بۇگە-شۇگەسىنە دەيىن ەسەپتەلىپ قوياتىندىقتان، شىعىن بولمايدى.

ال ازيادا مۇنداي ىستەرگە مۇقيات بولۋ كەرەك. مەن جاعاجايدىڭ جانىندا ورنالاسقان ياحتا تۋرالى فيلم تۇسىرسەم، ونى ەشكىم كورمەيدى. ال ينۆەستورلار ماعان كيللەر جىبەرۋى مۇمكىن. بۇدان وزگە ياحتانى جارۋىم دا عاجاپ ەمەس.

- كينومەن تاۋلىگىنە 24 ساعات اينالىساسىز با؟

- مەن بۇدان باسقا نەمەن اينالىسامىن؟ قولىمنان باسقا ەش نارسە كەلمەيدى. مي جاسۋشالارى دا كينونى ويلايدى. ءتىپتى، جاعاجايدا وتىرعان كەزدە مىنا جەردە جاقسى فيلم تۇسىرۋگە بولادى ەكەن دەپ ارمانداپ وتىرامىن.

- ال وتباسى شە؟

- مەن بۇل ءسوزدىڭ قانداي ماعىنا بەرەتىنىن باياعىدا ۇمىتقانمىن. جەتى جاسىمدا ۇيدەن كەتىپ قالعانمىن. قازىر اكە-شەشەم اۋستراليادا تۇرادى. مەن ۇيلەنگەن كەزدە ەكى ايەل وزىنە قول جۇمساعان ەكەن. ال ايەلىم نيۋ-يوركتە تىعىلۋدا. بالام تونيدىڭ مەنىمەن شارۋاسى جوق. مەنىڭ وتباسىم - ءتۇسىرۋ الاڭىندا جۇرگەن ادامدار جانە ءوزىم. ماعان فيلم تۇسىرگەن قاتتى ۇنايدى.

- ءسىزدىڭ سومداپ جۇرگەن رولدەرىڭىز فيزيكالىق دايىندىقتى تالاپ ەتەدى. بولاشاقتا مۇنداي تريۋكتەردى جاساي الماي قالاتىنىڭىزعا دايىنسىز با؟

- مەن كەز كەلگەن ۋاقىتتا زەينەتكە شىعۋعا دايىنمىن. مەن پروديۋسەر بولامىن. مۇنىمەن قاتار، قىتايدان ۇلكەن جەر ساتىپ الىپ، فيلمدەردەگى تريۋكتەردى جاساۋعا ۇيرەتەتىن مەكتەپ اشقىم كەلەدى. ال قارتايعان شاعىمدا الاڭسىز ءومىر ءسۇرۋ ءۇشىن ازيا شەكاراسىندا جەكە ماركامداعى كيىمدەردى ساتاتىن 80 دۇكەن، كورەيادا 4 مەيرامحانا، گاۆايدا - بىرەۋ جانە سيدنەيدە تاعى 2 مەيرامحانا اشتىم. سۋدى تازارتۋمەن اينالىساتىن فابريكا سالعىم كەلەدى. ول جەردەگى سۋ بوتەلكەنىڭ ىشىندە ساتىلاتىنداردان دا تازا بولادى. مۇنداي اپپاراتتار ۆەتنام، كامبودجا حالىقتارى ءۇشىن وتە ماڭىزدى. ولاردىڭ ءىشىپ جۇرگەن سۋىنىڭ لاستىعى سونشا، قانشا ءدارى ىشسە دە، ومىرىمەن قوش ايتىسۋدا. وسىنىڭ سالدارىنان قىتايدا جىلىنا اسقازان اۋرۋىنان 4000 بالا قايتىس بولادى.

- ادەتتەگى رولدەرمەن سالىستىرعاندا «اڭىز» فيلمىندەگى رولىڭىزدىڭ ايىرماشىلىعى قانداي؟

- مەن قىتاي ارمياسىنىڭ گەنەرالىن سومدايمىن. ەڭ قىزىعى، سول جەردەگى 1500 ادام مەنى تىڭدايدى. «اتتى اسكەر، العا!» دەسەم جەتىپ جاتىر... «توقتا!» وسى كەزدە مەنىڭ جانىمنان اتتار وتە شىعادى. ارتىما قاراسام، ولاردىڭ ۇستىندەگى ادامدار قۇلاپ قالعان ەكەن. وسىلايشا 25 ادامدى اۋرۋحاناعا جەتكىزدىك. اراسىندا كوماعا تۇسكەندەرى دە بار. اتتاردىڭ ادامداردى تاپتاپ وتە شىعاتىن كەزدەرى دە بولدى.

- قازىر قىتاي رەجيسسەرلەرى بەلسەندى تۇردە سوعىس ونەرىنە بايلانىستى فيلمدەردى ءتۇسىرىپ ءجۇر. ءسىز ولاردى باقتالاس رەتىندە مويىندايسىز با؟

- مەن ءوزىمنىڭ باسەكەلەسىم رەتىندە دجەت ليدى عانا مويىندايمىن. ازيادا ەكى مىقتى اكتەر بار. ءبىرى - دجەت لي، ەكىنشىسى - مەن. قالعاندارى بالانىڭ ويىنى عانا. ءبىر نارسەنى جارا سالىپ، ەكشن تۇسىردىك دەيدى. ال دجەكي چان - برەند. مەنىڭ ەسىمىمدى ەستىگەن كەزدە قيمىل قوزعالىسى كوپ، اراسىندا قالجىڭ دا بار، ەشقانداي دا ۇياتسىزدىق پەن زورلىققا جول بەرمەيتىن فيلم بولاتىنىن بىلەسىز.

- دەنەڭىزدە سىنىقتان امان سۇيەگىڭىز بار ما؟

- مۇمكىن ءبىر كىشكەنتاي سۇيەگىمنىڭ جولى بولعان شىعار.

- دجەكي چاننىڭ قاي جەرى سىندى؟

- بارلىق جەرى!

تانىمال اكتەر مۇرنىن ءۇش رەت سىندىرعان. ال «پوليسيا وقيعاسى» فيلمىن ءتۇسىرىپ جاتقان كەزدە ەكى ومىرتقاسىن سىندىرىپ، سال بولۋدان امان قالعان. ءبىر رەت تاماعىن جاراقاتتاپ، تىنىس الا الماي قالعان. ال جارىلعان قاباعىنىڭ ارقاسىندا ءبىر كوزىنەن ايىرىلۋى مۇمكىن ەدى.

«برونكستەگى جانجال» فيلمىنە تۇسكەن كەزدە توبىعىن سىندىردى. دارىگەرلەردىڭ قارسىلىعىنا قاراماستان، گيپستەلگەن اياعىنا شۇلىق كيىپ ءتۇسىرىلىم الاڭىنا قايتا ورالعان. كەلەسى ءبىر فيلمدە بايقاۋسىزدا دجەكي چاننىڭ قارسىلاسىنا وتكىر قىلىش بەرىلىپ، قولىن قاتتى جاراقاتتاپ، اۋىرعاننان قاتتى شىڭعىرعان ەكەن. وپەراتور مۇنى سسەناري بويىنشا ەكەن دەپ ءتۇسىرىلىمدى جالعاستىرا بەرگەن.

«جاراتقاننىڭ ساۋىت-سايمانى» فيلمىندە سارايدىڭ قابىرعاسىنان سەكىرۋ كەرەك بولاتىن. ءبىرىنشى رەت سەكىرگەنى وزىنە ۇناماي، تاعى دا ءبىر دۋبل جاساعان. كيىمى بۇتاققا ءىلىنىپ، ناتيجەسىندە جەرگە باسىمەن قۇلاعان ەكەن. باستىڭ ءبىر سۇيەگى ميعا ءتيىپ، ەكى قۇلاعىنان قان اتقىلاعان. اكتەر بۇل قيىندىقتان دا وڭاي قۇتىلعان. ەندى اكتەر كۇنىنە ەكى ساعات جاتتىعۋ جاساۋعا مىندەتتى. ال ساقتاندىرۋ كومپانيالارى، جوعارىدا ايتقانىمىزداي، دجەكي چاننىن بويىن اۋلاق سالۋدا.

دايىنداعان: قارلىعا بۇيەنباي

massaget.kz

2014-جىل