شي جينپيڭ: ش ى ۇ اياسىندا سيفرلىق ءبىلىم قاۋىمداستىعىن قۇرۋ كەرەك
استانا. KAZINFORM - قىتاي حالىق رەسپۋبليكاسىنىڭ ءتوراعاسى شي جينپيڭ «ش ى ۇ+» كەزدەسۋىندە ش ى ۇ اياسىندا سيفرلىق ءبىلىم قاۋىمداستىعىن قۇرۋدى ۇسىندى.
«ءبىز Beidou ناۆيگاتسيالىق جۇيەسىنىڭ قولدانىسىن كەڭەيتىپ، حالىقارالىق اي ستانساسىن قۇرۋ جوباسىنا قاتىسۋدى قۇپتايمىز. سيفرلىق ءبىلىم بەرۋ سالاسىندا ش ى ۇ قاۋىمداستىعىن قۇرۋدىڭ، سونىڭ اياسىندا سيفرلىق تەحنولوگيا ماماندارىن دايىنداۋ ءۇشىن الداعى ءۇش جىلدا مىڭنان كەم تۇسپەيتىن كۆوتا ءبولۋدى ۇسىنامىز»، - دەدى شي جينپيڭ.
سونداي-اق، ول ش ى ۇ اياسىندا وڭىرلىك ىنتىماقتاستىقتى ىلگەرىلەتۋدىڭ باسىم باعىتتارىن اتادى.
«بۇل باعىتتا اۋىل شارۋاشىلىعى تەحنولوگيالارىن دامىتىپ، ساۋدا-ەكونوميكالىق ىنتىماقتاستىقتى كەڭەيتۋ ماڭىزدى. سونداي-اق، ەكولوگيا جانە قورشاعان ورتانى قورعاۋ سالاسىنداعى ىنتىماقتاستىقتى دامىتۋ قاجەت. ۇلتتىق ۆاليۋتانىڭ ەسەپ ايىرىسۋداعى ۇلەسىن كوبەيتىپ، ش ى ۇ اياسىندا قارجىلاندىرۋ الاڭىن قۇرۋ باعىتىندا بەلسەندى جۇمىس جۇرگىزۋ كەرەك»، - دەدى قىتاي باسشىسى.
