EXPO اۋماعىندا جاڭا تەحنولوگيالىق كلاستەر قۇرىلادى
استانا. KAZINFORM - قازاقستاندا يننوۆاتسيالىق ينفراقۇرىلىمدى دامىتۋدىڭ كەلەسى كەزەڭى رەتىندە EXPO اۋماعىندا جاڭا تەحنولوگيالىق كلاستەر قۇرۋ جوسپارلانىپ وتىر.
بۇل تۋرالى ۇكىمەت وتىرىسىندا پرەمەر- ءمينيستردىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆ مالىمدەدى.
ءمينيستردىڭ ايتۋىنشا، Exponential Cluster دەپ اتالاتىن بۇل الاڭ عىلىم، تەحنولوگيالىق ستارتاپتار مەن يندۋستريانى بىرىكتىرەتىن ءبىرتۇتاس ەكوجۇيەگە اينالادى.
- قازىرگى ۋاقىتتا كلاستەر اياسىندا Robotics, DroneTech, GameDev, Cybersecurity, MedTech, AgriTech جانە Industry 4.0 باعىتتارى بويىنشا مامانداندىرىلعان ورتالىقتار قالىپتاسىپ جاتىر، - دەدى جاسلان ماديەۆ.
ونىڭ سوزىنشە، جاڭا كلاستەر جىل سايىن 500 گە دەيىن ستارتاپتى ىسكە قوسۋعا مۇمكىندىك بەرەدى. ونىڭ ىشىندە 100 دەن استام hardware جوبا جۇزەگە اسادى. سونىمەن قاتار ەلدە ۇشقىشسىز تەحنولوگيالاردى دامىتۋعا ەرەكشە نازار اۋدارىلىپ وتىر.
- قازاقستاندا حالىقارالىق تەحنولوگيالىق كومپانيالاردىڭ قاتىسۋىمەن ۇشقىشسىز اۆتوموبيلدەر بويىنشا پيلوتتىق جوبا ىسكە قوسۋ جوسپارلانىپ وتىر. جوبانى 2026 -جىلدىڭ ەكىنشى توقسانىندا جۇزەگە اسىرۋ كوزدەلگەن. سونىمەن قاتار درون ارقىلى جەتكىزۋ قىزمەتىن ەنگىزۋ جونىندەگى پيلوتتىق جوبا دا ىسكە اسىرىلۋدا، - دەدى مينيستر.
ءمينيستردىڭ ايتۋىنشا، بۇل باستامالار قالالىق موبيلدىلىك پەن لوگيستيكانىڭ جاڭا مودەلدەرىن سىناقتان وتكىزۋگە مۇمكىندىك بەرەدى.
بۇعان دەيىن ۇكىمەت وتىرىسىندا يننوۆاتسيالاردى دامىتۋ ماسەلەسى تالقىلاناتىنىن جازعان ەدىك.
