EURO-2026: فۋتزالدان قازاقستان قۇراماسى البانيادان باسىم ءتۇستى
استانا. KAZINFORM - بۇگىن فۋتزالدان قازاقستان ۇلتتىق قۇراماسى 2026-جىلعى ەۋروپا چەمپيوناتىنىڭ ىرىكتەۋ كەزەڭىندەگى بەسىنشى ويىنىن البانياعا قارسى وتكىزدى.
كەزدەسۋ بارىسىندا قازاقستاندىق ويىنشىلار جىلدام گول سوعۋعا تىرىستى. ناتيجەسىندە دامير قايىرباي 7-مينۋتتا ەسەپ اشسا، ودان كەيىن لەو جاراگۋا 8، 17-مينۋتتا ەكى مارتە مەرگەندىك تانىتتى.
ەكىنشى كەزەڭنىڭ باستاپقى ۋاقىتىندا البانيالىق ويىنشىلار بەلسەندىلىگى بايقالدى. ويىننىڭ 24-مينۋتىندا ولار ەسەپ ايىرماسىن قىسقارتتى.
ال 26-مينۋتتا قازاقستاندىق قۇرامانىڭ كاپيتانى شىڭعىس ەسەنامانوۆتىڭ الىستان تەپكەن دوبى قاقپا تورىندا تۋلاپ جاتتى.
ويىننىڭ 38-مينۋتىندا البانيالىق فۋتزالشىلار تاعى ءبىر مارتە گول سوقتى.
وسىلايشا قازاقستان قۇراماسى قارسىلاسىنان 4:2 ەسەبىمەن باسىم ءتۇستى.
قازاقستاندىق فۋتبولشىلار التىنشى توپتا سىنعا ءتۇسىپ جاتىر. قازىر تۋرنير كەستەسىندە ءتورت تۋردان كەيىن ون ۇپايمەن ارمەنيا ءبىرىنشى ورىندا تۇر. بەس ويىننان كەيىن قازاقستاننىڭ ۇپايى ولارمەن تەڭەستى.
ەندى 8-ناۋرىزدا البانيا سىرت الاڭدا دانيامەن شەبەرلىك بايقاسادى.
قۇرلىقتىق دودانىڭ فينالدىق ساتىسىنا تىكەلەي بەرىلەتىن جالعىز جولداما تاعدىرى 12-ناۋرىزدا وتەتىن ارمەنيا جانە قازاقستان كەزدەسۋىندە شەشىلەدى.
ەسكە سالساق، بۇدان بۇرىن فۋتزالدان قازاقستان ۇلتتىق قۇراماسى 2026-جىلعى ەۋروپا چەمپيوناتىنىڭ ىرىكتەۋ كەزەڭىندەگى ءتورتىنشى ويىنىندا دانيانى جەڭدى.
