شۆەتسيا يادرولىق شابۋىلعا قارسى ون مىڭداعان بۋنكەرىن كۇشەيتپەك

استانا. KAZINFORM - شۆەتسيا ازاماتتىق باسپانالارىن قايتا جاڭارتا باستادى، دەپ حابارلايدى BILD.

ەلدەگى بارلىق 64 مىڭ بۋنكەر ادامداردى يادرولىق سوققىدان قورعاي الاتىنداي كۇيگە كەلتىرىلۋى ءتيىس. بۇل تۋرالى شۆەتسيانىڭ ازاماتتىق قورعاۋ قىزمەتى (MSB) حابارلادى. جوندەۋ جۇمىستارىنا 100 ميلليون كرون ءبولىندى، بۇل شامامەن 9 ميلليون ەۋرونى قۇرايدى.

MSB مالىمەتىنشە، قاجەت بولعان جاعدايدا بۋنكەرلەر 7 ميلليونعا جۋىق ادامعا قورعان بولا الادى (شۆەتسيانىڭ بۇكىل حالقى شامامەن 10,5 ميلليون ادام).

ەلدە مۇنداي باسپانالاردىڭ ەكى ءتۇرى بار: تۇرعىن ۇيلەرگە سالىنعان باسپانالار جانە جارتاستارعا قاشالعان نەمەسە ەرەكشە بەرىك بەتوننان سالىنعان «فەللبۋنكەرلەر». ولار جارىلىس تولقىندارى مەن سىنىقتاردان عانا ەمەس، رادياتسيالىق، حيميالىق نەمەسە بيولوگيالىق قارۋلاردان دا قورعايدى.

مودەرنيزاتسيا جوباسى شۆەتسيادا قابىلدانعان «جالپى قورعانىس» ستراتەگياسىنا سايكەس كەلەدى، سوعىس بولعان جاعدايدا ءاربىر ازامات ءوز ءرولىن ءبىلۋى جانە ارەكەت ەتۋگە دايىن بولۋى كەرەك. قازىردىڭ وزىندە 25 ۇلكەن بۋنكەردە جوندەۋ جۇمىستارى باستالىپ كەتتى.

شۆەتسيا پرەمەر- ءمينيسترى ۋلف كريستەرسسون ەل 2030 -جىلعا قاراي اسكەري شىعىنداردى ىشكى جالپى ءونىمنىڭ %2,4 ىنان %3,5 ىنا دەيىن ارتتىراتىنىن ايتتى. ول مۇنى «قىرعي- قاباق سوعىستان كەيىنگى ەڭ ۇلكەن قورعانىس كەشەنى» دەپ اتادى. 2023 -جىلى شۆەتسيا بەيتاراپتىقتان باس تارتىپ، ناتو- عا كىردى.

وسىعان دەيىن شۆەتسيا ۇلتتىق قاۋىپسىزدىككە قاتەر توندىرەتىن ادامداردى ازاماتتىعىنان ايىراتىنىن حابارلادى.