شۆەتسيا ەلشىسى قازاقستاندى كولىكپەن ساياحاتتادى
اقتاۋ. KAZINFORM - شۆەتسيانىڭ قازاقستانداعى ەلشىسى ەۆا پۋلانو ەل اۋماعىن كولىكپەن ارالاپ شىققان. ول جولداسىمەن بىرگە ساياحاتتاپ ءجۇر.
ولار ساپاردى 20-ماۋسىم كۇنى استانادان باستاپ، اقمولا، قوستاناي، اقتوبە وبلىستارىنىڭ ۇستىنەن وتكەن. ودان سوڭ جىلىوي اۋدانىنداعى قۇلسارى قالاسىنا باردى. ساپاردىڭ قازاقستان اۋماعىنداعى بولىگى ماڭعىستاۋ وبلىسىندا ءتامامدالعان. ساياحاتشىلار ودان ءارى، باكۋ ارقىلى ەۋروپانىڭ 7-8 مەملەكەتىن ارالاپ، شۆەتسياعا دەيىن بارۋدى جوسپارلايدى.
ديپلومات مۇنداي ساياحات ارقىلى وڭىرلەرمەن جاقىنىراق تانىسىپ، ەلدىڭ مادەنيەتى مەن تۇرمىسىن تەرەڭىرەك ءتۇسىنۋدى ماقسات ەتكەن.
- قۇرىقتان اتتاناتىن پارومدى كۇتكەن كەزدە، اقتاۋدى ارالاپ ۇلگەردىك. ءبىر ءساتتىڭ اسەرىن سيپاتتاپ كورەيىن. جاعاجايداعى مەيرامحانادان كاسپيدى تاماشالادىق. اينالامىز باقىتتى ادامدارعا تولى بولدى. داستارحاندا ءدامى ءتىل ۇيىرەتىن جەرگىلىكتى ءدام. كۇننىڭ باتقانىنا وسىلاي قاراپ تۇرۋ سان ءتۇرلى سەزىمدەرگە بوي الدىرىپ، ۇمىتىلماس كەش بولىپ ەستە قالدى، - دەيدى شۆەتسيانىڭ قازاقستانداعى ەلشىسى ەۆا پۋلانو.
شۆەتسيا ەلشىسىنە ەلدى مەكەندەردى كولىكپەن ارالاعان ۇناعان. ول ساياحاتتان ەرەكشە اسەر العانىن ايتادى.
- ەلدى مەكەندەر اراسىندا ءۇيىر- ءۇيىر جىلقى، سيىر مەن تۇيەنى كورىپ، ەرەكشە اسەردە بولدىم. بۇل مەن ءۇشىن ەكزوتيكا. وسى ساپارعا ۇيىتقى بولعان كۇيەۋىمە العىس ايتامىن. استانادان ستوكگولمعا كولىكپەن قايتۋ ونىڭ يدەياسى بولعان. قازاقستاندى ەندى تەك تابيعاتى ادەمى مەملەكەت قانا ەمەس، تاعىلىمى مول مەكەن دەپ ايتا الامىن. سوندىقتان شۆەد ازاماتتارى مەن وتكەن ساپاردى وزدەرى جاساپ، كوزبەن كورسە ەكەن دەيمىن، - دەيدى ەلشى.
