شەتەلدىكتەر قازاقستانعا قانداي ماقساتپەن ءجيى كەلەدى

استانا. KAZINFORM - قازاقستانعا كەلەتىن شەتەلدىكتەردىڭ سانى جىلدان جىلعا ءوسىپ جاتىر. بۇل تۋرالى ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ ءمالىم ەتتى.

- بيىل ءبىرىنشى جارتىجىلدىقتا ەلگە 7,5 ميلليون شەتەل ازاماتى (ەلدەن شىققاندار - 7,2 ميلليون) كەلدى. وتكەن جىلمەن سالىستىرساق، 600 مىڭ ادامعا ءوسىپ وتىر. ولاردىڭ 90 پايىزى تاۋەلسىز مەملەكەتتەر دوستاستىعى ەلدەرىنىڭ ازاماتتارى. بۇگىندە قازاقستاندا 212 مىڭ شەتەل ازاماتى تۇراقتى تۇرىپ جاتىر. ونىڭ 42 مىڭى الماتى قالاسىندا، 32 مىڭى الماتى وبلىسىندا، 17 مىڭى - استانا مەن قاراعاندى وبلىسىندا. ولاردىڭ سانى 3 جىلدا %42 ءوستى، - دەدى باۋىرجان الەنوۆ ۇكىمەت وتىرىسىندا.

ىشكى ىستەر مينيسترلىگىنىڭ مالىمەتىنشە:

- قازاقستاندا 430 مىڭ شەتەل ازاماتى ۋاقىتشا تۇرىپ جاتىر؛

- 360 مىڭ شەتەل ازاماتى ەلىمىزگە جۇمىس بابىمەن كەلگەن؛

- 17 مىڭ شەتەل ازاماتى ەلىمىزگە وتباسى جاعدايىمەن كەلگەن؛

- 8 مىڭ شەتەل ازاماتى ەلىمىزگە ءبىلىم الۋ ءۇشىن كەلگەن.

- 44 مىڭ شەتەل ازاماتى ەلىمىزگە ءتۇرلى ماقساتپەن (جەكە شارۋا، تۋريزم جانە ت. ب.) كەلگەن.

ايتا كەتەيىك، بيىل 1 ميلليونعا جۋىق شەتەل ازاماتى قازاقستانعا كەلۋگە ءوتىنىش بەرگەن.

سونداي-اق پرەمەر-مينيستر كوشى-قون ساياساتىن جەتىلدىرۋگە قاتىستى مينيسترلەرگە بىرنەشە مىندەت جۇكتەدى.