شەتەلدىكتەر ديماشتىڭ ءانى ارقىلى قازاق ءتىلىن ۇيرەنىپ جاتىر
استانا. KAZINFORM - ەندى شەتەل ازاماتتارى ديماش قۇدايبەرگەننىڭ ءانى ارقىلى قازاق ءتىلىن ۇيرەنە الادى. بۇل تۋرالى «ءتىل-قازىنا» ۇلتتىق عىلىمي-پراكتيكالىق ورتالىعى اباي ينستيتۋتىنىڭ جەتەكشىسى اينۇر تولەۋ ايتتى.
- ديماشتىڭ تىڭدارماندارى ارنايى پلاتفورما جاساۋ كەرەكتىگىن ۇسىندى. سەبەبى، ولار سۇيىكتى ءانشىسىنىڭ نە تۋرالى ايتىپ جاتقانىن تۇسىنگىسى كەلەدى ەكەن. ءبىز وسى ۇسىنىستى ماماندارمەن اقىلداسىپ، كاراوكە ستيلىندە جاساپ شىقتىق. ءانشى فاناتتارىنىڭ باسىم بولىگى باتىستان بولعاندىقتان، ءاننىڭ سوزدەرىن لاتىن قارپىندە جازدىق، - دەدى ول «Jibek Joly» ارناسىنداعى «بۇگىنlive» باعدارلاماسىندا.
وسى قوسىمشا ارقىلى قازاق ءتىلىن ۇيرەنگەن ازاماتتار قازىردىڭ وزىندە الەۋمەتتىك جەلىدەگى پاراقشاعا پىكىرلەرىن جازىپ وتىرادى ەكەن.
- شەتەلدىك ازاماتتار ديماش ارقىلى تەك قازاقتىڭ ءتىلىن عانا ەمەس، ادەبيەتى مەن مادەنيەتىن دە مەڭگەرىپ جاتىر. ءتىپتى ءبىزدىڭ ۇلتتىق تاماقتارىمىزدان ءدام تاتقىلارى كەلەتىنى تۋرالى جازادى. سوندىقتان، قوسىمشانى ودان ءارى سالت-داستۇرلەردى قوسىپ جەتىلدىرەمىز، - دەيدى اينۇر تولەۋ.
ايتا كەتەيىك، اباي ينستيتۋتىنىڭ پورتالى مەن ارنايى موبيلدى قوسىمشاسى ارقىلى كەز كەلگەن شەتەلدىك قازاق ءتىلىن مەڭگەرە الادى. بۇل پورتال تەك ساباق بەرىپ قانا قويمايدى. مۇندا شەتەلدەگى قازاق دياسپوراسى ءۇشىن دايىندالعان بەينەساباقتار، قازاق جانە اعىلشىن تىلىندەگى تاپسىرمالار، ءتىپتى اباي ينستيتۋتىنىڭ بۇكىل الەمدەگى وكىلدىكتەرىنىڭ بايلانىس دەرەكتەرى بار.
- جوبا 2020-جىلى ىسكە قوسىلعان. الەمنىڭ كەز كەلگەن نۇكتەسىندە كەز كەلگەن ادام سوڭعى ادىستەمەلىك تاسىلدەرمەن قازاق ءتىلىن ءوز بەتىنشە ۇيرەنە الادى، - دەيدى جوبا قۇراستىرۋشىلارى.
ايتا كەتەيىك، بۇعان دەيىن ديماشتىڭ حالىقارالىق جوباسى قازاقستاننىڭ تۋريستىك الەۋەتىن تانىستىراتىنىن جازعان ەدىك.
