شەتەلدىك ب ا ق-تاعى قازاقستان: «ورتا ءدالىزدىڭ» بولاشاعى، ا ق ش-پەن بايلانىس جانە الماتىعا ساياحات

 وسى اپتادا شەتەلدىك ب ا ق-تا قاسىم-جومارت توقايەۆتىڭ تۇركيا پرەزيدەنتىمەن سويلەسكەنى، «ورتا ءدالىزدىڭ» بولاشاعى، قازاقستان مەن ا ق ش-تىڭ بايلانىسى، مالايزيامەن ىنتىماقتاستىق، CGTN اقپارات اگەنتتىگى ءتىلشىسىنىڭ الماتىعا ساياحاتى جايلى ماقالالار جاريالاندى. تولىعىراق قازاقپارات ساراپشىسىنىڭ شولۋىندا. 

Daily Sabah: تۇركيا مەن قازاقستان پرەزيدەنتتەرى ەكى ەلدىڭ بايلانىسى مەن ايماقتىق ماسەلەلەردى تالقىلادى

2-قازاندا تۇركيالىق Daily Sabah باسىلىمى وتكەن دۇيسەنبىدە تۇركيا پرەزيدەنتى رەجەپ تايىپ ەردوعان قازاقستان پرەزيدەنتى قاسىم- جومارت توقايەۆپەن تەلەفون ارقىلى تىلدەسكەنى جايلى جازدى. اگەنتتىكتىڭ حابارلاۋىنشا، مەملەكەت باسشىلارى ەكىجاقتى قارىم-قاتىناس پەن ايماقتىق جانە جاھاندىق ماسەلەلەردى تالقىلاعان.

«اڭگىمەلەسۋ بارىسىندا ەكى ەلدىڭ كوشباسشىلارى قاراشا ايىندا قازاقستاندا وتەتىن تۇركى مەملەكەتتەرى ۇيىمى (ت م ۇ) سامميتى اياسىندا مەملەكەت باسشىلارى كەڭەسىنىڭ كۇن تارتىبىنە ەنگىزىلۋى مۇمكىن تاقىرىپتار بويىنشا پىكىر الماستى»، - دەلىنگەن تۇركيا كوممۋنيكاتسيالار باسقارماسىنىڭ حابارلاماسىندا.

ەسكە سالايىق، بۇعان دەيىن سامميت ناۋرىز ايىندا انكارادا وتكەن بولاتىن.

تۇركى مەملەكەتتەرى ۇيىمى 2009 -جىلى قۇرىلدى. قازىرگى ۋاقىتتا ۇيىمعا ازەربايجان، قازاقستان، قىرعىزستان، تۇركيا جانە وزبەكستان كىرەدى. ماجارستان مەن تۇرىكمەنستان بايقاۋشى مارتەبەسىنە يە.

Agenda.ge: قازاقستاندا گرۋزيا، ازەربايجان، تۇركيا، رۋمىنيا وكىلدەرىمەن ورتا ءدالىزدىڭ بولاشاعى تالقىلانىپ جاتىر

1-قازاندا گرۋزيالىق Agenda.ge باسىلىمى قازاقستاننىڭ اقتاۋ قالاسىندا ورتا ءدالىز جوباسى جايلى جازدى. باسىلىمنىڭ حابارلاۋىنشا، وتكەن جەكسەنبى كۇنى گرۋزيا تەمىر جول دەلەگاتسياسى تۇركيا، ازەربايجان، قازاقستان جانە رۋمىنيادان كەلگەن ارىپتەستەرىمەن بىرگە قىتاي مەن ەۋروپانى بايلانىستىراتىن ترانسكاسپي حالىقارالىق كولىك باعىتى، لوگيستيكا، جەتكىزىلىمدەر جانە تىزبەكتەر تاقىرىبىندا جيىن وتكىزگەن.

«كەزدەسۋگە قاتىسۋشىلار بيىلعى سەگىز ايداعى جۇمىس ناتيجەلەرى مەن جاڭا گەوساياسي احۋالداعى تاسىمال ماسەلەلەرىن تالقىعا سالدى»، - دەپ جازادى باسىلىم.

تاراپتار سونداي- اق ورتا دالىزدە تاسىمالداۋ شارتتارىن وڭتايلاندىرۋ بويىنشا ءوزارا ىنتىماقتاستىق تۋرالى قۇجاتتى، سونىمەن بىرگە كاسپي تەڭىزىندەگى فيدەرلىك كەمەلەر جۇمىسىنىڭ تۇراقتىلىعىن قامتاماسىز ەتۋ جونىندەگى كەلىسىمدى تالقىلاعان.

Eureporter: «ەكونوميكالىق كوپىر» سالۋ: قازاقستان مەن ا ق ش- تىڭ بايلانىسى دامىپ كەلەدى

6-قازاندا Eureporter باسىلىمىندا قازاقستان مەن ا ق ش-تىڭ قارىم-قاتىناسى، ەلىمىزدىڭ شەتەلدىك ينۆەستيتسيا تارتۋ جونىندەگى وڭىرلىك كوشباسشى ەل رەتىندەگى ءرولى جايلى ماقالا جاريالاندى.

«2021-2022 -جىلدار ارالىعىندا قازاقستان مەن ا ق ش-تىڭ تاۋار اينالىمى 37 پايىز- عا ارتقان، بۇل ەكىجاقتى ساۋدانىڭ ايتارلىقتاي وسكەنىن كورسەتىپ وتىر. قازاقستاننان ا ق ش-قا ەكسپورت 2022 -جىلى 1,15 ميلليارد دوللارعا، ال ا ق ش-تان قازاقستانعا يمپورت 1,9 ميلليارد دوللارعا جەتتى. ا ق ش-قا نەگىزگى ەكسپورت - مينەرالدار (60,2 پايىز) مەن مەتالدار (20,3 پايىز)، ال نەگىزگى يمپورت - كولىك قۇرالدارى (30 پايىز) مەن ماشينا (26,7 پايىز)»، - دەلىنگەن ماقالادا.

اۆتوردىڭ پىكىرىنشە، بۇل ءوسىم قازاقستان مەن اقش اراسىنداعى ەكونوميكالىق بايلانىس بەرىك ەكەنىن كورسەتەدى. ونى 166 بىرلەسكەن كاسىپورىن دا دالەلدەپ وتىر.

New Straits Times: مالايزيانىڭ ەڭبەك مينيسترلىگى ساۋد ارابياسى، قازاقستان ۇكىمەتتەرىمەن بىرگە جول قاۋىپسىزدىگى مەن تەحنيكالىق قىزمەت كورسەتۋ بويىنشا باستامالاردى تالقىلادى

4-قازاندا مالايزيالىق گازەتNew Straits Times مالايزيانىڭ ەڭبەك ءمينيسترى داتۋك سەرى الەكساندر نانتا لينگگي ساۋد ارابياسى كولىك جانە جول ۆيتسە- ءمينيسترى بادر بين ابدۋللا ءال- دۋلاميمەن جانە قازاقستاننىڭ كولىك ءمينيسترى مارات قارابايەۆپەن ينفراقۇرىلىم، قاۋىپسىزدىك جانە اۆتوموبيل جولدارىن كۇتىپ ۇستاۋدى جاقسارتۋ جوسپارلارىن تالقىلاعانىن جازدى.

«نانتا ەكى دەلەگاتسيامەن دە پراگادا جول كونگرەستەرىنىڭ تۇراقتى حالىقارالىق قاۋىمداستىعى (PIARC) ۇيىمداستىرعان 27-دۇنيەجۇزىلىك جول كونگرەسى 2023 ءىس-شاراسىندا كەزدەسكەنىن ايتتى. ساۋد ارابياسى دەلەگاتسياسىمەن كەزدەسۋدە ول ەكى ەلدەگى جول قاۋىپسىزدىگى جانە تەحنيكالىق قىزمەت كورسەتۋ اسپەكتىلەرى بويىنشا ستراتەگيالىق ىنتىماقتاستىقتى ودان ءارى نىعايتۋعا نيەتتى ەكەنىن جەتكىزدى. ال مارات قارابيەۆ مالايزياداعى پورت ينفراقۇرىلىمىن سالۋ، دامىتۋ جانە باسقارۋ سالاسىنداعى تاجىريبەسىنە قىزىعۋشىلىق تانىتقانىن ايتقان»، - دەلىنگەن باسىلىمدا.

Euronews: گەرمانيا مەن ورتالىق ازيا ەلدەرى «ورتا ءدالىز» بويىنشا قارىم- قاتىناستى دامىتپاقشى

30-قىركۇيەكتە Euronews باسىلىمى گەرمانيا كانتسلەرى ولاف شولتس قازاقستان، قىرعىزستان، تاجىكستان، تۇرىكمەنستان جانە وزبەكستان باسشىلارىمەن كەزدەسىپ، ايماقتىق جانە ەكونوميكالىق ىنتىماقتاستىقتى نىعايتۋ ماسەلەلەرىن تالقىلاعانى جونىندە ماقالا جاريالادى.

«گەرمانيا كانسلەرى ولاف شولتس جۇما كۇنى ورتالىق ازيانىڭ بەس مەملەكەتىنىڭ باسشىسىمەن كەزدەستى. بەرليندە قازاقستان، قىرعىزستان، تاجىكستان، تۇرىكمەنستان جانە وزبەكستان باسشىلارى وڭىرلىك جانە ەكونوميكالىق ىنتىماقتاستىقتى نىعايتۋ، سونداي-اق ايماقتى ەۋروپامەن بايلانىستىراتىن «ورتا ءدالىزدى» دامىتۋ ماسەلەلەرىن تالقىلادى»، - دەپ جازادى اگەنتتىك.

CGTN: الماتىعا ساياحات

2-قازاندا CGTN اقپارات اگەنتتىگى «الماتىعا ساياحات» دەگەن اتاۋمەن ماقالا جاريالادى.

وندا اۆتور «الماتى - قازاقستان مەن بۇكىل ورتالىق ازيا ايماعىنىڭ نەگىزگى قارجى، تەحنولوگيالىق، ءبىلىم بەرۋ، مادەني جانە كولىك ورتالىعى، سونداي-اق قىتاي مەن قازاقستاندى بايلانىستىراتىن ماڭىزدى كوپىر قىزمەتىن اتقاراتىنىن جازادى.

«الماتى «ءبىر بەلدەۋ، ءبىر جول» باستاماسىنا ەلەۋلى ۇلەس قوسادى. CGTN ءتىلشىسى قالانى ارالاپ ءجۇرىپ، قىتايلىق برەندتەر ورنالاسقان كوشەدە اككوردەوندا ويناعان مۋزىكانتتاردى كەزدەستىردى. پانفيلوۆشىلار ساياباعىندا تۋريستەر ەكىنشى دۇنيەجۇزىلىك سوعىستا قازا تاپقان 28 جاۋىنگەردى ەسكە الۋعا ارنالعان ماڭگىلىك الاۋ جانىندا ءجۇر. ۆوزنەسەنسكي سوبورىنىڭ جانىنداعى الاڭ جەرگىلىكتى تۇرعىندار مەن تۋريستەرگە تولى، ونىڭ ىشىندە ورتالىق ازيانىڭ باسقا ەلدەرى مەن قىتايدان كەلگەن تۋريستەردىڭ كوگەرشىندەردى تاماقتاندىرىپ جۇرگەنىن كورۋگە بولادى»، - دەپ جازعان ماقالادا.

اۆتور

نازەركە سۇيىندىك