شەتەلدىك اۆتوكولىكتەردى تىركەۋ 31- جەلتوقساندا اياقتالادى
شەتەلدەن اكەلىنگەن اۆتوكولىكتەردى تىركەۋگە الۋ 31- جەلتوقسانعا دەيىن جالعاسادى. سول سەبەپتى، اۆتوسىن ءالى كۇنگە دەيىن تىركەمەگەن كولىك يەلەرى تەزىرەك قيمىلداۋى كەرەك.
سونداي-اق ۋاقىتتىڭ از قالۋىنا بايلانىستى ءتۇرلى الاياقتار پايدا بولا باستاعان.
Kazinform ءتىلشىسىنىڭ سۇراقتارىنا جاۋاپ بەرگەن ماڭعىستاۋ وبلىسى پوليتسيا دەپارتامەنتى اكىمشىلىك پوليتسيا باسقارماسى پروتسەسسينگتىك ورتالىعىنىڭ باستىعى، پوليتسيا پودپولكوۆنيگى ەرلان كەزبايەۆ وسىنى ەسكەرتتى.
- شەتەلدەن اكەلىنگەن اۆتوكولىكتى ءبىر رەتتىك زاڭداستىرۋ ناۋقانى باستالعالى وڭىردە نەشە كولىك تىركەلدى؟
- پرەزيدەنتتىڭ وتكەن جىلعى حالىققا جولداۋىندا 2022-جىلدىڭ 1- قىركۇيەگىنە دەيىن ەل اۋماعىنا شەتەلدەن اكەلىنگەن اۆتوكولىكتەردى ءبىر رەتتىك الىم - 200 مىڭ تەڭگە تولەۋ ارقىلى تىركەۋ تاپسىرىلعانى بەلگىلى. تاپسىرما اياسىندا بىرنەشە قۇزىرلى مينيسترلىك كەڭەسىپ، تالقىلاۋ ارقىلى 2023-جىلدىڭ 23- قاڭتارىنان باستاپ 30- ماۋسىمىنا دەيىن شەتەلدەن اكەلىنگەن اۆتوكولىكتەردى تىركەۋ جۇمىستارى باستالىپ كەتتى. كولىك تىركەۋ اياسىندا مەرزىم بەلگىلەنگەننەن كەيىن وتىنىمدەردى قابىلداۋ 1- شىلدەدە توقتاتىلدى. ال قازىرگى تاڭدا 2023-جىلدىڭ 1- شىلدەسىنە دەيىن ءوتىنىم بەرىپ ۇلگەرگەن، ءبىراق ءارتۇرلى سەبەپتەرمەن تىركەۋگە كەدەرگىلەر بولعان ازاماتتاردىڭ كولىكتەرى بويىنشا جۇمىستار جالعاسىپ جاتىر. تىركەۋ بيىلعى جىلدىڭ 31- جەلتوقسانىنا دەيىن جالعاسادى. بۇگىنگە دەيىن وڭىردە 17760 شەتەلدىك اۆتوكولىك تىركەلدى. ونىڭ ىشىندە كونسترۋكتور ەسەبىندە ۋاقىتشا تىركەۋگە قويىلعاندار بار.
- كولىك نەلىكتەن ۋاقىتشا تىركەۋگە قويىلادى؟
- اۆتوكولىكتەر ءوزىنىڭ تىركەلگەن مەملەكەتىندە، ياعني شەت مەملەكەتتە تىركەۋدە تۇرسا، تىركەۋدەن الىنباسا نەمەسە قانداي دا ءبىر شەكتەۋ بولسا ولار ءبىزدىڭ ەلدە ۋاقىتشا تىركەۋگە الىنادى.
- ماڭعىستاۋعا اۆتوكولىكتەردىڭ باسىم بولىگى قاي مەملەكەتتەردەن اكەلىنگەن؟
- وبلىسقا كوبىنە كولىكتەر ەۋرازيالىق وداق مەملەكەتتەرىنەن، اتاپ ايتساق رەسەي فەدەراتسياسى، بەلارۋس، ارمەنيا جانە قىرعىزستان مەملەكەتىنەن اكەلىنگەن. سونداي-اق اتالعان ەلدەردەن كەلگەن اۆتوكولىكتەر كەدەندىك تازارتۋسىز 200 مىڭ تەڭگە تولەممەن تىركەۋگە قويىلىپ جاتىر. وسى ساناتتاعى رەسەيدەن اكەلىنگەن 3891 اۆتوكولىك تىركەلدى. ارمەنيادان - 9767 قىرعىزستاننان - 45 اۆتوكولىك، بەلارۋستەن 4 اۆتوكولىك تىركەلدى. ودان بولەك ەۆرازيالىق وداققا جاتپايتىن 3 مەملەكەتتەن اكەلىنگەن اۆتوكولىكتەردى دە تىركەۋ ءجۇرىپ جاتىر. ولار كەدەندىك تازارتۋعا جاتادى. كولىكتەرگە كەدەندىك تازارتۋدان وتكەننەن كەيىن عانا 200 مىڭ تەڭگە تولەم قويىلادى.
- كولىگىن زاڭداستىراتىن ازاماتتار نەنى ەسكەرۋى كەرەك؟
- اۆتوكولىكتەردى تىركەۋدىڭ 4 تالابى بار. ول اۆتوكولىك 2022-جىلدىڭ 1- قىركۇيەگىنە دەيىن اكەلىنگەن بولۋى كەرەك، ودان سوڭ كەدەندىك تازارتۋدان وتكەن بولۋى قاجەت. تىركەلگەن مەملەكەتتە ىزدەستىرۋدە نەمەسە قانداي دا ءبىر قىلمىستىق ىسكە قاتىسى بولماۋى ءتيىس، سونداي-اق كولىك قۇرالىنىڭ تىركەۋ نۇسقاسى وريگينال بولۋ كەرەك. وسى تالاپتارعا ساي بولسا، شەتەلدەن اكەلىنگەن اۆتوكولىك تىركەۋگە جاتادى. ازاماتتار وسى تالاپتاردى ەسكەرگەنى ءجون.
- تىركەۋ ۋاقىتىنىڭ اياقتالۋىنا از ۋاقىت قالدى عوي؟
- ءيا، شەتەلدەن اكەلىنگەن اۆتوكولىكتەردى تىركەۋ 31- جەلتوقسانعا دەيىن جالعاسادى. سول سەبەپتى، ءالى كۇنگە تىركەمەي جۇرگەن كولىك يەلەرى تەزدەتىپ كەلىپ، تىركەۋىن سۇرايمىز. ۋاقىتتىڭ از قالۋىنا بايلانىستى ءارتۇرلى الاياقتاردىڭ كولىك تىركەپ بەرەمىز دەگەنىنە سەنىپ قالماۋىن ەسكەرتەمىز. ءتۇرلى تاسىلدەر ارقىلى حالىق اراسىندا ءجۇرىپ اقشالاي نە باسقالاي كومەك كورسەتەمىز دەگەن الداۋ-ارباۋعا ۇرىنىپ قالماۋلارى كەرەك. جاقىندا وسىنداي ءبىر فاكت بولدى. وبلىسىمىزدا كولىكتى تىركەۋ جۇمىستارىن اكىمشىلىك پوليتسيا باسقارماسىنىڭ پروتسەسسينگتىك ورتالىعى ءبولىمى اتقارادى. بارلىق تىركەۋ جۇمىسىنا جاۋاپتى - وسى بولىمشە. سوندىقتان بارلىق تۇسىنبەگەن سۇراقتارىڭىز بويىنشا بىزدەن اقپارات الۋىڭىزعا بولادى.
- سۇحباتىڭىزعا راحمەت!
اۆتور ينديرا ساتەنباي
