شەتەلدەگى قازاق جادىگەرلەرىنىڭ كاتالوگى جاسالادى

استانا. KAZINFORM - ۇلتتىق مۋزەي ديرەكتورى بەرىك ءابدىعالي ۇلى Jibek Joly تەلەارناسىنا بەرگەن سۇحباتىندا شەتەلدەگى قازاقي جادىگەرلەردى تۇگەندەۋ جۇمىستارى باستالعانىن ءمالىم ەتتى.

مۋزەي باسشىسىنىڭ سوزىنشە، قازىر ۇلتتىق مۋزەيدە 200 مىڭنان استام ەكسپونات بار. ولاردى تاماشالاۋعا جىلىنا 600 مىڭ ادام كەلەدى. ەندى وسى قوردى بايىتۋ ءۇشىن شەتەلدەگى قازاق جادىگەرلەرىنە تۇگەندەۋ جۇرگىزۋ كوزدەلىپ وتىر.

- الداعى 5 جىلدا قازاقتىڭ شەتەلدە جاتقان جادىگەرلەرىن تۇگەندەپ كاتالوگتەرىن شىعارۋدى كوزدەپ وتىرمىز. بۇل قولىمىزدان كەلەدى، ماماندارىمىز بار. دەمەۋشى بولسىن، مەملەكەتتەن بولسىن، قاراجات تابىلىپ جاتسا، ۇيىمداستىرۋعا بولادى. سىرتتاعى جادىگەردىڭ ءبارىن اكەلمەسەك تە، ءاربىر ازامات قاي ەلدە قانداي جادىگەرىمىز جاتقانىن كاتالوگكە قاراپ بىلەتىندەي بولۋ كەرەك. ءتۇپنۇسقاسىن نەمەسە كوشىرمەسىن اكەلۋ - ەكىنشى ماسەلە. ءبىراق تۇگەندەۋىمىز كەرەك. قازىر وسى جۇمىستى قولعا الىپ جاتىرمىز، - دەدى بەرىك ءابدىعالي ۇلى «ۋادە» باعدارلاماسىندا.

ەسكە سالساق، كەشە قازاقستان مۋزەيلەرىنىڭ Ⅲ كونگرەسى باستالعانىن جازعان ەدىك.

اۆتور

ەسىمجان ناقتىباي