شەتەلدەگى قارۋلى قاقتىعىستارعا قاتىساتىن قازاقستاندىقتارعا شارا قولدانىلادى

استانا. KAZINFORM - اقشالاي سىياقى الۋ ماقساتىندا شەتەلدەگى اسكەري ءىس-قيمىلدارعا قاتىساتىن قازاقستاندىقتارعا شارا قولدانىلادى، دەپ حابارلايدى ءى ءى م باسپا ءسوز قىزمەتى.

ءى ءى م الەۋمەتتىك جەلىلەردە وزگە مەملەكەتتەردىڭ قارۋلى كۇشتەرىمەن كەلىسىم جاساسۋ ارقىلى اقشالاي سىياقى الۋ ۇسىنىسى بار جارناما مەن بەينەروليكتەردىڭ تارالا باستاعانىن اتاپ ءوتتى.

- قارۋلى قاقتىعىستارعا قاتىسقان جاعدايدا ق ر قىلمىستىق كودەكسىنە ساي قىلمىستىق جاۋاپتىلىق شارالارى كوزدەلگەن. قازاقستاندىق ازامات شەت مەملەكەتتىڭ اۋماعىندا قارۋلى قاقتىعىسقا نەمەسە اسكەري ءىس-قيمىلدارعا قاتىسقانى ءۇشىن جالدامالىق بەلگىلەر بولماعان كەزدە (ق ك-نىڭ 172-بابى) 5 جىلدان 9 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جاۋاپتىلىق قاراستىرىلادى، - دەپ ەسكەرتەدى ءىىم.

ال جالدامالى بولعانى ءۇشىن (ق ك-نىڭ 170-بابى) ءىس-ارەكەتتىڭ اۋىرلىعىنا قاراي 7 جىلدان استام مەرزىمگە باس بوستاندىعىنان ايىرۋ نە قازاقستان رەسپۋبليكاسىنىڭ ازاماتتىعىنان ايىرا وتىرىپ نەمەسە ونسىز، مۇلكى تاركىلەنىپ ءومىر بويىنا باس بوستاندىعىنان ايىرۋ تۇرىندەگى جازا كوزدەلگەن.

ءى ءى م ازاماتتارعا قازاقستان رەسپۋبليكاسىنىڭ زاڭناماسىن ساقتاۋعا جانە ەلەۋلى قۇقىقتىق سالدارعا اكەپ سوعۋى مۇمكىن ارەكەتتەرگە قاتىسۋدان باس تارتۋعا قاتاڭ كەڭەس بەرەدى.

ايتا كەتسەك، ىشكى ىستەر مينيسترلىگى كوشەلەردەگى جارنامالار ارقىلى ەسىرتكىنىڭ تارالۋىن بولدىرماۋ ءۇشىن قارقىندى جۇمىس جۇرگىزىپ كەلەدى.