شەتەلدەگى ەلشىلىكتەردى ۇستاۋعا بيۋدجەتتەن قانشا قاراجات جۇمسالادى
استانا. KAZINFORM - قازاقستاننىڭ الەم ەلدەرىندەگى ەلشىلىكتەرى مەن ديپلوماتيالىق كورپۋستى ۇستاۋعا بيۋدجەتتەن جىل سايىن قانشا قارجى قارالادى؟
Kazinform سىرتقى ىستەر مينيسترلىگىنە رەسمي ساۋال جولداعان ەدى.
- قازىرگى ۋاقىتتا قازاقستان رەسپۋبليكاسى الەمنىڭ 80 ەلىندە ديپلوماتيالىق وكىلدىكتەرىن اشقان، اتاپ ايتقاندا: 75 ەلشىلىك، 7 حالىقارالىق ۇيىمدار جانىنداعى تۇراقتى وكىلدىك، 28 باس كونسۋلدىق جانە 6 - كونسۋلدىق مەكەمە بار. وڭىرلىك ءبولىنىس (ەلشىلىكتەر/كونسۋلدىق مەكەمەلەر): ەۋروپا - %49/%38، ازيا - %22/%32، سولتۇستىك جانە وڭتۇستىك امەريكا - %6/%3، افريكا جانە تاياۋ شىعىس - %22/%27، تىنىق مۇحيت ايماعى - %1، - دەپ جازىلعان جاۋاپتا.
قۇزىرلى ورگان ەلشىلەر مەن ديپلوماتيالىق كورپۋستىڭ الەمنىڭ تۇكپىر-تۇكپىرىندە وتباسىلارىمەن الاڭسىز ءارى قاۋىپسىز جاعدايدا جۇمىس ىستەۋى ءۇشىن جاعداي جاساۋعا جىل سايىن جالپى سوماسى قانشا اقشا جۇمسالاتىنىن ايتۋدان باس تارتتى.
- «اقپاراتقا قول جەتكىزۋ تۋرالى» ق ر زاڭىنىڭ 11-بابى 16-تارماعىنىڭ 3-تارماقشاسىنا سايكەس، ەگەر سۇرالعان اقپارات قولجەتىمدىلىگى شەكتەۋلى اقپاراتقا جاتقىزىلسا، ونى ۇسىنۋدان باس تارتىلادى. ق ر سىرتقى ىستەر ءمينيسترىنىڭ 2025 -جىلعى 29 -ساۋىردەگى № 11-1-4/256 بۇيرىعىمەن بەكىتىلگەن شەكتەۋلى تاراتىلاتىن قىزمەتتىك اقپارات تىزبەسىنىڭ 1.21-13-تارماقشاسىنا سايكەس (ورتالىق اپپاراتتىڭ جانە شەتەلدىك مەكەمەلەردىڭ شتات كەستەسى، قارجىلاندىرۋ جوسپارلارى مەن شىعىستار ليميتتەرى)، سونداي-اق 1.21-تارماقشاسىنا سايكەس (شىعىندار قۇرىلىمى)، سۇرالعان مالىمەتتەر شەكتەۋلى اقپارات ساناتىنا جاتادى. وسىعان بايلانىستى، سونداي-اق «ماسس-مەديا تۋرالى» قازاقستان رەسپۋبليكاسى زاڭىنىڭ 36-بابى 2-تارماعىنىڭ 3) تارماقشاسىنا سايكەس، اتالعان اقپاراتتى ۇسىنۋ مۇمكىن ەمەس، - دەپ جازادى س ءى م باسپا ءسوز قىزمەتى.
2025 -جىلدىڭ بيۋدجەتىندە سىرتقى ىستەر مينيسترلىگىنىڭ جالپى شىعىنى 114 ميلليارد 476 ميلليون 369 مىڭ تەڭگە دەپ كورسەتىلگەن. سونىڭ ىشىندە ەلشىلىكتەردىڭ شىعىنىمەن قاتىستى ءبىر عانا باعىتتىڭ قارجىسى ناقتى كورسەتىلگەن. اتاپ ايتساق، «شەتەلدەگى ديپلوماتيالىق وكىلدىكتەردىڭ ارنايى، ينجەنەرلىك- تەحنيكالىق جانە ناقتى قورعالۋىن قامتاماسىز ەتۋ» شىعىندارىنا 241 ميلليون 320 مىڭ تەڭگە بەكىتىلگەن.
اۆتور
ەسىمجان ناقتىباي
