شەتەلدە تۋروپەراتور پروبلەماسىنا تاپ بولعاندار نە ىستەۋ كەرەك
استانا. KAZINFORM - شەتەلدەن ەلگە كەلە الماي جاتقان قازاقستان ازاماتتارى ءبىرىنشى كەزەكتە ەلشىلىكتەرگە حابارلاسۋى كەرەك. بۇل تۋرالى ق ر سىرتقى ىستەر ءمينيسترىنىڭ ورىنباسارى نازيرا نۇربايەۆا ايتتى.
بۇگىن سەناتتىڭ جالپى وتىرىسىنان كەيىن تىلشىلەر TEZ. KZ تۋروپەراتورى قىزمەتىنىڭ توقتاۋىنا قاتىستى شەتەلدە قالىپ قويعان 300 تۋريستى قايتارۋ ءىس- قيمىلىنا قاتىستى سۇراق قويدى.
ءوز كەزەگىندە ن. نۇربايەۆا شەتەلدەگى قازاقستاننىڭ ەلشىلىكتەرى ەل ازاماتتارىنا كومەكتەسەتىنىن ايتتى.
«بىرىنشىدەن، ەل ازاماتتارى ەلشىلىكتەرمەن بايلانىسقا شىعۋى كەرەك. وسىدان كەيىن ەلشىلىك قىزمەتكەرلەرى باسقا دا مەملەكەتتىك ورگاندارمەن بىرلەسە پروبلەمانىڭ شەشىمىن جاساۋعا ارەكەت ەتەدى»، - دەدى سىرتقى ىستەر ءمينيسترىنىڭ ورىنباسارى.
بۇدان بۇرىن حابارلانعانداي، قازاقستان رەسپۋبليكاسى ازاماتتارىنىڭ شىعۋ ءتۋريزمى سالاسىنداعى قۇقىقتارىنا كەپىلدىك بەرۋ جۇيەسىنىڭ اكىمشىسى «تۋريستىك قامقور» ك ق اقپاراتى بويىنشا TEZ. KZ تۋروپەراتورى قىزمەتىن توقتاتقانىن حابارلادى.
اتالعان تۋروپەراتور قازاقستان ازاماتتارىنىڭ ءتۋريزمى سالاسىنداعى قۇقىقتارىنا كەپىلدىك بەرۋ جۇيەسىنىڭ قاتىسۋشىسى سانالادى. بۇگىندە شەتەلدە بۇل تۋروپەراتوردان 300 دەن استام قازاقستاندىق تۋريست بار.
