شەتەلدە كادر دايارلاۋ جونىندەگى رەسپۋبليكالىق كوميسسيانىڭ وتىرىسى ءوتتى
قازاقستان رەسپۋبليكاسىنىڭ مەملەكەتتىك كەڭەسشىسى ەرلان قاريننىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى، دەپ حابارلايدى اقوردانىڭ باسپا ءسوز قىزمەتى.
رەسپۋبليكالىق كوميسسيانىڭ شەشىمىمەن 167 قازاقستاندىققا «بولاشاق» حالىقارالىق ستيپەندياسى تاعايىندالدى. ونىڭ 131 ءى ماگيستراتۋرادا، 4 ءۋى دوكتورانتۋرادا وقۋ جانە 32 ءسى تاعىلىمدامادان ءوتۋ ءۇشىن الەمنىڭ جەتەكشى جوعارى وقۋ ورىندارىنا جانە ءوندىرىس ورتالىقتارىنا جىبەرىلەدى.
ستيپەندياتتاردىڭ 65 پايىزى ينجەنەرلىك-تەحنيكالىق ماماندىقتار مەن جاراتىلىستانۋ عىلىمدارى بويىنشا، ال قالعان 35 پايىزى قوعامدىق-گۋمانيتارلىق باعىت بويىنشا ءبىلىم الادى.
سونىمەن بىرگە كوميسسيا وتىرىسىندا شەتەلدىك جەتەكشى عىلىمي ورتالىقتاردا تاعىلىمدامادان ءوتۋ ءۇشىن ستيپەنديا تاعايىنداۋ ماسەلەسى دە قاراستىرىلدى. كوميسسيا شەشىمىنە سايكەس 481 ۇمىتكەرگە ستيپەنديا تاعايىندالدى.
وتىرىس قورىتىندىسى بويىنشا مەملەكەتتىك كەڭەسشى «بولاشاق» حالىقارالىق ستيپەندياسىن جانە عىلىمي تاعىلىمدامالار باعدارلاماسىن ودان ءارى جۇزەگە اسىرۋ جونىندە ناقتى تاپسىرمالار بەردى.
