شەتەلگە زاڭسىز 600 توننا قورعاسىن مەن 100 توننا اليۋميني اسىرماق بولعاندار ۇستالدى
استانا. KAZINFORM - «زاڭ جانە ءتارتىپ» قاعيداتىن ىسكە اسىرۋ اياسىندا ىشكى ىستەر مينيسترلىگى ستراتەگيالىق شيكىزاتتى شەتەلگە زاڭسىز شىعارۋ بويىنشا كولەڭكەلى سحەمالارعا قارسى كۇرەسىپ جاتىر، - دەپ حابارلايدى Polisia.kz.
قىلمىسكەرلەر مەتالداردىڭ كەيبىر تۇرلەرىن ەكسپورتتاۋعا موراتوريي جاريالانعانىنا قاراماستان، ولاردى شەكارادان كونتراباندالىق جولمەن شىعارۋعا ارەكەتتەر جاسالىپ جاتىر. قابىلدانعان شارالاردىڭ ناتيجەسىندە، جەتىسۋ وبلىسى پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسى پروكۋراتۋرامەن بىرلەسىپ، رۇقسات قۇجاتتارىنسىز جۇمىس ىستەگەن كومپانيانىڭ زاڭسىز قىزمەتىنىڭ جولىن كەستى.
اتالعان كومپانيا ءتۇستى مەتالداردى زاڭسىز قابىلداپ، وڭدەۋدى ۇيىمداستىرىپ، ىلەسپە قۇجاتتارعا جالعان مالىمەتتەر ەنگىزۋ ارقىلى ولاردى بىرنەشە رەت ەل اۋماعىنان تىسقارى شىعارۋعا تىرىسقان.
كاسىپورىن اۋماعىندا جۇرگىزىلگەن ءتىنتۋ شارالارى بارىسىندا شەتەلگە جونەلتۋگە دايىندالعان 600 توننادان استام قورعاسىن جانە 100 توننادان استام اليۋميني قۇيمالارى، سونداي-اق ءتۇستى مەتال سىنىعى تاركىلەندى.
مەتال بالقىتۋعا ارنالعان جاسىرىن سەح پەن ونىڭ قۇرامىن الدىن الا زەرتتەۋگە ارنالعان زەرتحانا جويىلدى. بۇدان بولەك، نىسان اۋماعىندا زاڭسىز ەڭبەك ەتكەن، كوشى-قون زاڭناماسىن بۇزعان شەتەلدىك ازاماتتار ۇستالىپ، ولار زاڭناماعا سايكەس جاۋاپقا تارتىلدى. قازىرگى ۋاقىتتا سوتقا دەيىنگى تەرگەپ-تەكسەرۋ جۇرگىزىلىپ، قىلمىستىق سحەمانىڭ تۇپكى بەنەفيسيارلارى انىقتالۋ ۇستىندە.
وسىعان دەيىن ءى ءى م مەتال سىنىقتارىن كونتراباندالىق جولمەن تاسىمالداۋ سحەمالارىن انىقتاعانى تۋرالى جازدىق.
